Կեղծ ապրանքանիշով ապրանք է վաճառվել

Հայաստանում, ինչպես և աշխարհի շատ երկրներում, մեծ տարածում ունի կեղծ ապրանքանիշերով ապրանքի վաճառքը, ինչը մեծ խոչընդոտ է բրենդային ապրանքներ արտադրողների և նրանց ներկայացուցիչների համար:

Նման խնդրի առաջ է կանգնել մանկական տակդիրների ներկրմամբ զբաղվող «Լինեթ լիմիթեդ» ընկերությունը (Nannys ապրանքանիշ), որը դիմել է ՀՀ Տնտեսական մրցակցության պաշտպանության պետական հանձնաժողովին՝ տեղեկացնելով, որ հանդիսանում է «Nannys» ապրանքային նշանի իրավատերը և արտադրող ընկերության բացառիկ ներկայացուցիչը Հայաստանում:

Սակայն շուկայում հայտնվել են «Nannys» եւ «Nanny Fresh» ապրանքային նշաններով և նույն փաթեթավորմամբ մանկական տակդիրներ ու թաց անձեռոցիկներ, որոնց փաթեթի վրա նշված է, որ տվյալ ապրանքային նշանի պաշտոնական ներկայացուցիչը ՀՀ-ում «Սեմի Ինտերթրեյդ» ընկերությունն է: «Տնտեսական մրցակցության պաշտպանության մասին» ՀՀ օրենքի համաձայն՝ գրանցված ապրանքային նշանի օգտագործումն առանց իրավատիրոջ համաձայնության համարվում է անբարեխղճ մրցակցության դրսևորում:

Թեև երկու ընկերությունների ներկայացուցիչները նախորդ օրը գրավոր կերպով դիմել են Հանձնաժողովին՝ տեղեկացնելով իրենց միջև կնքված հաշտության համաձայնագրի մասին, այնուամենայնիվ, ՏՄՊՊՀ-ն համարում է , որ «Սեմի Ինտերթրեյդ»-ի վարքագծի պատճառով որոշակիորեն խախտվել է մրցակցությունը, ինչի արդյունքում էլ վնաս է պատճառվել «Nannys» ապրանքային նշանի իրավատեր հանդիսացող «Լինեթ լիմիթեդ» ընկերությանը:

ՏՄՊՊՀ երեկվա՝ սեպտեմբերի 14-ի նիստում որոշում է կայացվել «Սեմի Ինտերթրեյդ» ընկերությանը ենթարկել պատասխանատվության նախորդ տարվա հասույթի 1 %-ի չափով: ՏՄՊՊՀ որոշմամբ՝ տնտեսվարողը պարտավորվում է 10-օրյա ժամկետում վերացնել խախտումը՝ ետ կանչելով ապրանքը շուկայից: