Անբարեխիղճ գովազդի համար տուգանվել է «Հայր և որդի Մարտիրոսյաններ» ընկերությունը

Այսօր՝ սեպտեմբերի 14-ին ՀՀ Տնտեսական մրցակցության պաշտպանության պետական հանձնաժողովն անբարեխիղճ գովազդի համար տուգանք է կիրառել «Հայր և որդի Մարտիրոսյաններ» ընկերության նկատմամբ: ՏՄՊՊՀ-ի ուսումնասիրությունները և վարույթները նպատակ ունեն բացառել այնպիսի գովազդների տարածումը, որոնք պարունակում են անհարկի համեմատություններ կամ որակումներ՝ նույն գործունեությամբ զբաղվող այլ տնտեսվարողների հանդեպ:

«Ընկերությունն իրեն հավասար մրցակից չունի ոչ միայն Հայաստանում, այլև՝ ողջ տարածաշրջանում»- եթեր հեռարձակվող այս գովազդի հեղինակը քարերի ներկրմամբ և իրացմամբ զբաղվող «Հայր և որդի Մարտիրոսյաններ» ընկերությունն է: Օրենքն արգելում է այնպիսի գովազդների պատրաստումը, որը վերաբերում է այլ տնտեսվարողների դիրքի և նրանց արտադրած ապրանքների համեմատություններին:

Այլ կերպ ասած՝ տնտեսվարողն իրավունք ունի իր արտադրատեսակի վերաբերյալ սպառողին ներկայացնելու հավաստի տեղեկատվություն, սակայն իրավասու չէ նշելու, որ իր արտադրանքը «եզակի է», «ամենալավն է», «համար առաջինն է», «նմանը չունի» և այլն: ՏՄՊՊՀ որոշմամբ, անբարեխիղճ մրցակցության դրսևորման համար «Հայր և որդի Մարտիրոսյաններ» ընկերության հանդեպ կկիրառվի տուգանք՝ նախորդ տարվա հասույթի 1 %-ի չափով:

Իր խոսքում ՏՄՊՊՀ նախագահ Ա. Շաբոյանը տնտեսվարողներին կոչ է արել ապրանքը գովազդելիս լինել զուսպ և խուսափել այլ տնտեսվարողի արտադրանքին վնաս պատճառող որակումներից: