Ձվի շուկայում խախտումներ են հայտնաբերել

Սեպտեմբերի 12-13-ին ՀՀ գյուղատնտեսության նախարարության սննդի և անվտանգության պետական ծառայության կողմից իրացման կետերում կատարվել է ձվի շուկայի ուսումնասիրություն, որի արդյունքում պարզվել է, որ «Լուսակերտ ՏԹՖ» ՍՊԸ-ի կողմից 08.09.12թ. և 13.09.12թ. օրերին արտադրված,«Արզնի Տոհմային ԹՏԽ» ԲԲԸ-ի կողմից 10.09.12թ. արտադրված, «Աշտարակ ձու» ՍՊԸ-ի կողմից 29.08.12թ., 03.09.12թ. եւ 05.09.12թ. օրերին արտադրված ձվերը թարմ չեն:

Գյուղնախարարության սննդի անվտանգության պետական ծառայության տեղեկատվության և հասարակայնության հետ կապերի բաժնից հայտնել են, որ լաբորատոր փորձաքննության և փորձագիտական եզրակացության արդյունքում պարզվել է նաև, որ մակնշման և արտադրության օրերը չեն համապատասխանում:

Արտադրող տնտեսավարողներին տրվել է ձվի նշված խմբաքանակների՝ շուկայից հետկանչման հանձնարարական:

Ծառայությունը կոչով դիմում է սպառողներին՝ պահպանել զգոնություն և մինչև իրացման ցանցից ամբողջ խմբաքանակի դուրսբերումը ձեռք չբերել և չօգտագործել ձու նշված խմբաքանակներից: