Դատական համակարգն իր դատարկությունը ցույց տվեց Մարտի 1-ի դատավարության ժամանակ

«Ժողովրդավարության հասնելու համար անհրաժեշտ է լինել տնտեսապես կայուն»։ Ժողովրդավարության միջազգային օրվան նվիրված ասուլիսի ժամանակ ասաց հոգեբան Կարինե Նալչաջյանը։ 

Նա նշեց, որ ուսումնասիրություններից հետո ես տեսնում, որ շատ հարցեր գալիս ու հանգում են տնտեսությանը: Պետք է հասնել ներքին կայունության. «Եթե չլինի դա, մենք չենք դիմանա արտաքին մարտահրավերներին»:

Բանախոսի խոսքերով՝ Հայաստանում դեմոկրատիան շատ դժվարությամբ է առաջ գնում, և մենք պետք է գտնենք մեր մոդելը:

«Հայաստանը յուրահատուկ երկիր է։ Երբ մենք վերցնում ենք ազգային արժեքների նկատմամբ վերաբերմունքը և այն համադրում եվրոպական ժողովրդավարական արժեքներին, նոր ենք համոզվում, որ դրանք իրար hետ համատեղելի չեն»,- ասաց նա:

Նալչաջյանն ընդգծեց, որ Հայաստանի գերխնդիրն այսօր մեր ազգի հզորացումն է: Դրա համար, ըստ նրա, իշխանության մեջ հարկավոր է ներգրավել այնպիսի մարդկանց, ովքեր ունեն ինքնուրույն մտածողություն և բարձր գիտելիքներ:

Ասուլիսի մյուս բանախոս քաղաքացիական հասարակության ինստիտուտի խորհրդի նախագահ Արտակ Կիրակոսյանն էլ իր հերթին նշեց, որ Հայաստանում ժողովրդավարություն կհաստատվի այն ժամանակ, երբ դատական համակարգն ինքնուրույն լինի. «Հայ ազգային կոնգրեսի» ակտիվիստ Տիգրան Առաքելյանը ենթարկվել է 6 տարվա ազատազրկման. մարտի 1-ի զոհերի հարազատները փոխհատուցում չեն ստացել: Ամբողջ դատական համակարգն իր դատարկությունը ցույց տվեց Մարտի 1-ի դատավարության ժամանակ»,-ասաց նա:

Հիշեցնենք, որ այսօր Ժողովրդավարության միջազգային օրն է։ Միավորված ազգերի կազմակերպության տոնացույցով սեպտեմբերի 15-ին նշվում է Ժողովրդավարության միջազգային օրը: Այս տարի օրվա թեման է «Կրթություն ժողովրդավարության ոլորտում»: