Ո՞վ է միջահասակ, շատ թիկնեղ, կարճ և շատ հաստ վզով անձը, ով չի անցնում «Հարսնաքար»-ի գործով

Վահե Ավետյանի իրավահաջորդի շահերի ներկայացուցիչներ Տիգրան Եգորյանի, Լուսինե Հակոբյանի ու Վահե Գրիգորյանի տրամադրության տակ կա «Հարսնաքար» ռեստորանային համալիրում ռազմական բժիշկ Վահե Ավետյանին առնչվող հայտնի միջադեպում որոշակի դերակատարություն ունեցած, քրեական գործով ինքնությունը չպարզված ևս 10-15 անձանց նկարագրեր, այդ թվում՝ թիկնապահի դասական արտաքինով մի անձ:

«Միջին հասակի, շատ թիկնեղ, լիքոտ մարմնական կազմվածքով, կարճ և շատ հաստ վզով, դիմացի մասը մի քիչ ճաղատ և միջինից մի քիչ երկար բակերով (այտմորուս )»,- Tert.am-ի հետ զրույցում այսպես նկարագրեց այդ անձի արտաքինը Տիգրան Եգորյանը:

Ըստ «Հարսնաքար»-ում ծեծի ենթարկված մյուս բժիշկների, այդ անձը դեպքի օրը մոտեցել է վերջիններիս և հարցրել, թե ո՞վ է հայհոյել: Երբ բժիշկները նրան բացատրել են, որ՝ «Եղբայր, մենք եկել ենք այստեղ ծնունդ նշելու և ի՞նչ հայհոյանքի մասին է խոսքը», անձը ճշտել է, թե կարո՞ղ է իրենց հեռացած ընկերն է եղել հայհոյողը ( խոսքը սպորտային հագուստը փոխելու համար տուն գնացած Վահե Ավետյանի մասին է), բժիշկները պատասխանել են, որ նա գնացել է հագուստը փոխելու, եթե հայհոյած լիներ, չէր էլ վերադառնա, իրենք էլ նրան «Հարսնաքար»-ում չէին սպասի:

Սրանից հետո այդ անձը թողել-հեռացել է, սակայն, ըստ բժիշկների, այդ անձը դրսում որոշակի դերակատարություն է ունեցել, բայց թե ի՞նչ՝ այս պահին փաստաբանները չեն կարող արձանագրել:

Տուժողների շահերի ներկայացուցիչներին կոնկրետ անուններ և ազգանուններ հայտնի չեն: Գործում կցված ապացույցների թվում չկան նաև տեսաերիզներ: «Ի՞նչ տեսաերիզներ, նախաքննությունն իրականացնող մարմինը նույնիսկ չի էլ պարզել, թե որտե՞ղ են տեղադրված տեսախցիկները»,- ասաց Տիգրան Եգորյանը՝ նշելով, որ կոնկրետ այդ անձի մասով ՀՀ ոստիկանության Քննչական գլխավոր վարչության հատկապես կարևոր գործերի քննության բաժինը մերժել է փաստաբանների ներկայացրած մեղադրանքներն այն հիմքով, թե ինքնությունը չբացահայտած անձանց մասով քր. գործից անջատված մաս կա: Քննչական գլխավոր վարչությունից տեղեկացվել է նաև, որ այս անջատված մասով աշխատանքները կշարունակվեն, և կուսումնասիրվեն փաստաբանական հարցումներում ներառված տվյալները:

Նշենք, որ մոսկվաբնակ իրավաբան Արամ Մխիթարյանն էլ Aravot.am-ին, մասնավորապես, ասել է, որ «հանցախմբի անդամներն անթիվ են, իսկ գործով պարզաբանված չէ նրանցից յուրաքանչյուրի կատարած գործողությունը և հատկապես՝ ով է Վահեին մահացու հարված հասցնողը»: Այլ մանրամասներ Aravot.am-ը խոստանում է հրապարակել վաղվա «Առավոտի» համարում:

Հիշեցնենք, որ մոտ մեկ ամիս առաջ, Tert.am-ի հետ հարցազրույցում, Տիգրան Եգորյանը հայտարարել էր, որ (http://www.tert.am/am/news/2012/08/21/harsnakar-case/) «Հարսնաքարի» գործով նախաքննական հարցաքննությունները սուրճի գավաթի շուրջ զրույց են հիշեցնում:

Եգորյանը նշել էր նաև, որ Ոստիկանության Քննչական գլխավոր վարչության, հատկապես, կարևոր գործերի քննության բաժնին ներկայացված և մերժված իրենց միջնորդություններում կար նաև պահանջ՝ կոնկրետացնել, թե ո՞վ է եղել Վահեին մահացու հարվածողը, ովքե՞ր են եղել հարվածողները, նրանց դերակատարումը:

Տուժողի իրավահաջորդների շահերի ներկայացուցիչները միջնորդել էին նաև որպես կասկածյալ գործում ներգրավել Հայաստանի ֆուտբոլի ֆեդերացիայի նախագահ Ռուբեն Հայրապետյանին, Վահե Ավետյանին մահ պատճառած խմբին առաջադրված մեղադրանքը վերաորակել առավել ծանր՝ սպանության հոդվածով ( որի համար նախատեսվում է մինչև 20 տարի կամ ցմահ ազատազրկում), նշանակել դիակի դատաբժշկական կրկնակի հանձնաժողովային փորձաքննություն՝ «հաշվի առնելով դատաբժշկական եզրակացության որոշ սխալ հետևություններ» և այլն:

Փաստաբանները անհանգստացած էին, թե ինչո՞ւ նախաքննության մարմինն ուշադրություն չի դարձնում այն հանգամանքին, որ մի շարք վկաներ դեպքի օրը՝ ժամը 22:19-ից մինչև 22:23-ն ընկած ժամանակահատվածում, ստացել են 10, 20, 25, 15 վայրկյանանոց զանգեր: Օրինակ, կա Խնջոյան ազգանունով մեկը, որին այդ ժամանակահատվածում 9 անգամ զանգեր են ուղղվել: Ի դեպ, քննիչի առաջադրած բոլոր հարցերին ամբաստանյալները տվել են՝ «չեմ հիշում» կամ «չի տպավորվել, թե ինչ ենք խոսել» պատասխանները, իսկ վերջինս էլ որևէ լրացուցիչ հարցեր չի տվել: