Հայկական դրամն արժևորվում է

Նախորդ շաբաթվա ընթացքում ՀՀ ֆինանսական շուկայում ռեկորդային ծավալով դոլար է վաճառվել: Միայն կանխիկ արտարժույթի շուկայում բնակչությունը բանկերի մասնաճյուղերին առաջարկել է 110 մլն դոլարից ավելի, ինչը համարժեք է նախաամանորյա արտարժույթի առաջարկի ծավալներին։

«ՆԱՍԴԱՔՕԷՄԷՔՍ Արմենիա» բորսայում շաբաթական կտրվածքով վաճառվել է 17,5 մլն դոլար, ինչը ևս բարձր ցուցանիշ է, թեև ռեկորդային չէ:

Դոլարի առաջարկի աճի շնորհիվ հայկական դրամը սկսել է արժեվորվել դոլարի նկատմամբ: Արդյունքում՝ շաբաթվա ընթացում դոլարն էժանացել է մոտ 4 դրամով՝ 412,10 դրամից իջնելով մինչև 408,22 դրամ:

Դոլարի առաջարկի աճը հայկական ֆինանսական շուկայում կարող է ունենալ 2 պատճառ: Առաջին՝ խաղողի բերքահավաքը ստիպում է մոտ 3 տասնյակ կոնյակագործական և գինեգործական ընկերությունների վաճառել արտարժույթ: Ըստ news.am–ի հաշվարկների՝ միայն այդ գործոնով պայմանավորված շուկայում լրացուցիչ կհայտնվի (կամ արդեն հայտնվել է) մոտ 40 մլն դոլար: Եթե այս ենթադրությունը ճիշտ է, ապա դրամը կշարունակի իրեն ուժեղ զգալ նաև առաջիկա շաբաթվա ընթացքում։

Երկրորդ՝ բոլոր նախանշանները կան, որ միջազգային շուկայում ամերիկյան դոլարը արժեզրկվի թե՛ եվրոյի, և թե՛ մյուս արժույթների նկատմամբ: Դրան նպաստում են ինչպես Եվրոպական կենտրոնական բանկի կողմից պարտքային ճգնաժամի հաղթահարմանն ուղղված քայլերը, այնպես էլ տնտեսության խթանման ուղղությամբ ԱՄՆ ֆեդերալ ռեզերվային համակարգի ծրագրերը:

Պատահական չէ, որ Forex միջազգային շուկայում եվրոն արդեն գերազանցում է 1,3 դոլարի սահմանագիծը: Դոլարի անխուսափելի արժեզրկման սպասումները, հնարավոր է, ստիպում են տեղական ներդրողներին՝ կրկին վերանայել պահուստային ակտիվների կառուցվածքը։