Ուրախ կլինենք օգտակար լինել հայ հողագործներին. «Գրին Պլանետ»–ի տնօրեն

Այսօր ՀՀ գյուղատնտեսության նախարար Սերգո Կարապետյանն ընդունել է Երևանում գտնվող իտալական «Գրին Պլանետ» ընկերության տնօրեն Մասիմո Դե Մարզիսին:

Ողջունելով հյուրին, նախարարը գոհունակություն է հայտնել հայ-իտալական հարաբերությունների դինամիկ զարգացումից՝ գյուղատնտեսության բնագավառում և նշել, որ Հայաստանում լայնորեն օգտագործվում են իտալական արտադրության սարքավորումներն ու տեխնոլոգիաները: «Ցավոք, հակառակ պատկերն է Իտալիայում, որտեղ դեռևս քիչ են ծանոթ հայկական արտադրանքին»,- ասել է նախարարը՝ նշելով, որ այս ուղղությամբ պետք է ակտիվացնել գործակցության համատեղ ջանքերը:

Շնորհակալություն հայտնելով հանդիպման համար՝ պարոն Մասիմոն հակիրճ ներկայացրել է իրենց ընկերության գործունեությունը, այն է՝ օթերևութաբանական մոնիթորինգի իրականացում: Վերջինիս նպատակով ընկերությունն արտադրում է հատուկ կայաններ, որոնց միջոցով ուսումնասիրվում են գյուղատնտեսական տարածքի պարամետրերը: Ի՞նչ, ե՞րբ, ինչքա՞ն և ինչպե՞ս պետք է ստանա հողը էկոլոգիապես մաքուր և քիչ ծախսատար արտադրանք տալու համար: Այս տվյալները հասանելի են համացանցով հաղորդակցվող ֆերմերներին և արտադրողներին: «Ուրախ կլինենք այս ոլորտում համագործակցել նաև Հայաստանի հետ, օգտակար լինել հայ հողագործներին»,- նշել է պարոն Մասիմոն:

Հետաքրքրվելով ներկայացված ծրագրով՝ Սերգո Կարապետյանն առավել մանրամասն տեղեկատվություն է խնդրել նշված կայանների գործունեության վերաբերյալ, որի համակողմանի ուսումնասիրության արդյունքում միայն հնարավոր կլինի արձագանքել իտալական կողմի առաջարկին: