Արդյո՞ք Ջիոևան է լինելու Կրեմլի թեկնածուն

Հարավային Օսիայում վերջին մի քանի օրերին՝ մասնավորապես նախագահ Կոկոյտիի և ընդդիմության լիդեր Ալլա Ջիոևայի միջև ձեռք բերված պայմանավորվածությունները չի կարելի չդիտարկել այս օրերին Ռուսաստանում տիրող հետընտրական տրամադրությունների կոնտեքստում։ 

Նախ սկզբում փորձենք վերլուծել այս օրերին Ռուսաստանում զարգացող իրադարձությունները։ Ռուսաստանի իշխող էլիտան՝ ի դեմս Վլադիմիր Պուտին և Դմիտրի Մեդվեդև տանդեմի, կարծես թե չէր կարող չենթադրել, որ Ռուսաստանում բնակչության մի ստվար զանգվածի կողմից չի վայելում ժողովրդականություն, ինչի վառ ապացույցը իշխող «Единая Россия» կուսակցության նախորդ ընտրությունների համեմատ քիչ ձայներ հավաքելու փաստն էր։ Սակայն կարծես թե չէին հաշվարկել, որ այդ զանգվածը կարող է այնքան դինամիկ արձագանքել պետդումայի ընտրությունների կեղծված արդյունքներին, որ իշխող էլիտայի ներկայացուցիչները, նախքան ընտրությունների վերջնական արդյունքները հրապարակելը, եթե հերքում էին մասայական ընտրակեղծիքների դեպքերը, այժմ այդ նույն բարձրաստիճան ղեկավարները խոսում են տարբեր շրջաններում նոր ընտրություններ անցկացնելու մասին։

Այս օրերին նաև միջազգային մամուլը զերծ չմնաց Ռուսաստանի պետդումայի ընտրությունների արդյունքների վերաբերյալ տարբեր մեկնաբանություններ անելուց։ Ընդ որում գերակշռող մասը քննադատում էր ընտրությունները կեղծելու համար։ Մասնավորապես Միացյալ նահանգների պետքարտուղար Հիլըրի Քլինթընը ԵԱՀԿ արտաքին գործերի նախարարների դեկտեմբերի 6–7–ը կայացած հանդիպման ժամանակ՝ քննադատեց ՌԴ պետդումայի անցկացված ընտրությունները, ասելով, որ այն անցել է համատարած ընտրակեղծիքներով։

Վերջին մեկ շաբաթվա ընթացքում ռուսական մամուլը՝ հակառակ արևմտյան մամուլի չափազանց զսպվածությամբ էր լուսաբանում, հետընտրական տրամադրությունները։ Այնուամենայնիվ կարծես թե ռուսական «սպիտակ արջը» հասկանում է, որ Ռուսաստանը միանձյա կառավարելու ժամանակները ավարտվում են։

Այս ամենը կարելի է դիտարկել Հարավային Օսիայում տիրող հետընտրական իրավիճակով։ Նոյեմբերի 27–ին այդտեղ անցկացված նախագահական ընտրությունների երկրորդ փուլի արդյունքներով առավելագուն ձայներով հաղթանակ էր տարել ընդդիմության առաջնորդը՝ պարտության մատնելով «Կրեմլի աջակցությունը վայելող» Հարավային Օսիայի արտակարգ իրավիճակների նախարար Անատոլի Բիբիլյովին։ Սակայն կենտրոնական ընտրական հանձնաժողովը և Օսիայի պետական մարմինները չճանաչեցին ընդդիմության թեկնածու Ջիոևայի հաղթանակը։ Ալլա Ջիոևան նույնպես իր հայտարարություններում շեշտեց, որ ինքը նույնպես կարող է լինել «պաշտոնական Կրեմլի նախընտրած թեկնածուն»։

Պաշտոնական Կրեմլը Հարավային Օսիայի նախագահական ընտրությունների հաջորդ օրը ճանաչեց ընտրությունների արդյունքները՝ ըստ որի նախագահ էր ընտրվել Անատոլի Բիբիլյովը։ Սակայն Հարավային Օսիայում չհանդարտվող հետընտրական լարվածությունը, դրան գումարած Ռուսաստանում վերջին օրերի զարգացումները կարծես թե պաշտոնական Կրեմլին ստիպեց վերանայել իր դիրքորոշումը Հարավային Օսիայում տիրող իրավիճակի նկատմամբ։ Պատահական չէր ՌԴ պետդումայի ընտրությունների անմիջապես հաջորդ օրը Մեդվեդևի արած հայտրարությունը, որ պաշտոնական Կրեմլը ուշադրությամբ հետևում է Հարավային Օսիայում չդադարող հետընտրական լարվածությունններին։

Արդեն այսօր պարզ դարձավ, որ երեկ Ջիևայի և Օսիայի նախագահ Կոկոյտիի հետ ձեռք բերված պայմանավորվածության համաձայն այսօր երեկոյան հրաժարականի դիմում է ներկայացնելու Հարավային Օսիայի նախագահ Եդուարդ Կոկոյտին և անցկացվելու են նոր նախագահական ընտրություններ, որին նույնպես իր թեկնածությունը դնելու է Ալլա Ջիոևան։

Այս ամենը ենթադրելու տեղիք է տալիս, արդյո՞ք պաշտոնական Կրեմլը Հարավային Օսիայում 2012 թ–ի մարտի 25–ին անցկացվելիք նախագահական ընտրություններում արդեն ունի իր նախընտրած թեկնածուն՝ ի դեմս ընդդիմության առաջնորդ Ալլա Ջիոևայի։