Ճակնդեղը պետք է մթերվի առնվազն 100 դրամով

Ֆերմերները մեկ կգ շաքարի ճակնդեղի դիմաց պետք է ստանան ամենաքիչը 100 դրամ: Այսօր՝ սեպտեմբերի 19-ին լրագրողների հետ հանդիպման ժամանակ նման կարծիք է հայտնել Հայրենական ապրանքարտադրողների միության նախագահ Վազգեն Սաֆարյանը: Նրա կարծիքով՝ շաքարի ճակնդեղի աշխատատարությունը անշահավետ է դարձնում նրա աճեցումը ներկայիս մեկ կգ-ի դիմաց 30-40 դրամի պայմաններում, որը ֆերմերներին առաջարկում է Ախուրյանի շաքարի գործարանը:

«Հայաստանում շաքարի կայուն գինը, որն աշխարհում գնալով նվազում է, բացատրվում է շաքարի բիզնեսի մենաշնորհային վիճակով: Ինչ վերաբերում է տեղական արտադրանքին, ապա շաքարի ճակնդեղը պետք է սուբսիդավորվի պետության կողմից, կամ էլ խրախուսվի այլ միջոցով, բայց մեկ կգ-ի դիմաց գոնե 100 դրամ գնով: Համեմատության համար ասենք, որ նրա աճեցումը առավել աշխատատար է, քան կարտոֆիլինը, մինչդեռ կարտոֆիլը վաճառվում է 150 դրամով»,-ավելացրել է Սաֆարյանը:

Հիշեցնենք նաև, որ Ախուրյանի շաքարի գործարանը գործում է 2010թ.-ից: Գործարանն աշխատում է դադարներով՝ արտասահմանյան հումքի վրա: