Սպասվու՞մ է արդյոք նվազագույն աշխատավարձի բարձրացում

Հրանտ Բագրատյանն օրենսդրական նախաձեռնության կարգով առաջարկել է նվազագույն աշխատավարձը 32,500 դրամից բարձրացնել մինչև 72,500 դրամ: Պատգամավորի կարծիքով՝ դա թույլ կտա նվազագույն և միջին աշխատավարձերի միջեւ տարբերությունը 4 անգամից կրճատել մինչեւ 1.8 անգամ, որը նաև կնպաստի ստվերային տնտեսության կրճատմանը, միաժամանակ հավելյալ բյուջետային ծախսեր չի առաջացնի:

ՀՀ ֆինանսների նախարարության պատասխան եզրակացությունում նշվել է, որ նվազագույն աշխատավարձի բարձրացման առաջարկությունը համահունչ է կառավարության սոցիալ-տնտեսական քաղաքականությանը, սակայն պետք է համապատասխանի բյուջետային հնարավորություններին: Բացի այդ, Հ. Բագրատյանի առաջարկած չափով ավելացումը կառաջացնի լրացուցիչ բյուջետային ծախս՝ 360 մլրդ դրամի չափով, քանի որ Կառավարությունը ստիպված կլինի ավելացնել բյուջետային ոլորտի աշխատողների աշխատավարձը:

ՀՀ կառավարության եզրակացությանը հավանություն տալու հարցը ներառված է ՀՀ կառավարության սեպտեմբերի 20-ի նիստի օրակարգում: