Մեզ անհրաժեշտ են ներդրումներ, այլ ոչ թե վարկեր. Վազգեն Սաֆարյան

Հայաստանի տնտեսությանը ոչ թե վարկեր են պետք, այլ՝ ներդրումներ: Այդ մասին այսօր լրագրողների հետ հանդիպման ժամանակ ասել է Հայրենական ապրանքարտադրողների միության նախագահ Վազգեն Սաֆարյանը:

«Ներդրումները վարկերից օգտակար կլինեին և ԱԷԿ-ի, և Իրան-Հայաստան երկաթգծի կառուցման գործում: Ներդրողները կարող է լինել Չինաստանը, որը հետաքրքրված է մեր տարածաշրջանի ենթակառույցներում ներդրումներ կատարելու հարցում», – ասել է Վ. Սաֆարյանը: Նա նշել է նաև, որ Հայաստանի համար շատ կարևոր կարող էր լինել «Նաիրիտ» ՓԲԸ-ի աշխատանքի վերսկսման վարկավորումը, որը կազմում է 400 մլն դոլար:

Կարելի է նշել, որ վարկային հայցը արդեն 2 տարի քննարկվում է Զարգացման եվրասիական բանկում: Ինչ վերաբերում է Իրան-Հայաստան երկաթգծի կառուցմանը, դրա գաղափարը ծագել է 5 տարի առաջ: Շինարարության մրցույթն առայժմ չի սկսվել, քանի որ Հայաստանի տրանսպորտի նախարարությունը բանակցություններ է վարում ներդրողների հետ: Վարկային առաջարկի չափը դեռ չի նշվում:

Անորոշ վիճակում է ԱԷԿ-ի նոր էներգաբլոկի շինարարությունը. ռուսական կողմը պատրաստակամություն է հայտնել ներդնել ընդհանուր արժեքի 20–25%-ը:

Վ. Սաֆարյանը նշել է նաև, որ ակնկալում է՝ այս տարի Հայաստանում արդյունաբերական արտադրանքի ծավալը կաճի մոտ 6% -ով՝ 992 մլրդ-ից մինչև 1,05-1,06 տրլն դրամ:

Հարկ է նշել, որ արդյունաբերության նկատմամբ ուշադրությունը ապրանքարտադրողների աշխատանքի արդյունքն է, քանի որ նախորդ տարիներին ԱՄՀ-ն և Համաշխարհային բանկը Հայաստանի նման երկրներում խորհուրդ չէին տալիս զարգացնել արդյունաբերությունը,
բայց այժմ այն մեր տնտեսությունում առաջատար դիրքեր է զբաղեցնում: