ՄԻՊ-ը մերժել է Ռուբեն Հակոբյանի դիմումը, բայց պատրաստակամ է դիմել ՍԴ

Օգոստոսի 27-ին ՀՀ ԱԺ «Ժառանգություն» խմբակցության ղեկավար Ռուբեն Հակոբյանը խմբակցության անունից գրավոր դիմել էր ՀՀ մարդու իրավունքների պաշտպանին՝ ՀՀ ընտրական օրենսգրքի 60-րդ հոդվածի սահմանադրականությունը ՀՀ Սահմանադրական դատարանում վիճարկելու առաջարկով:

Lurer.com-ի հետ զրույցում ՄԻՊ գրասենյակի իրավական վերլուծության վարչության առաջատար մասնագետ Հայկ Աբգարյանն ասաց, որ նշված դիմումի վերաբերյալ կայացվել է որոշում և այդ որոշման մասին տեղյակ է պահվել նաև Ռուբեն Հակոբյանը:

«Ուսումնասիրելով գործը՝ հանգել ենք նրան, որ ներկայացված դիմումը չի ընդունվել մեզ մոտ, քանի որ դիմումը ֆիզիկական անձի խախտված իրավունքների հիմնարար ազատությունների պաշտպանության համար դիմում չէ: Մարդու իրավունքների պաշտպանի մասին ՀՀ օրենքով՝ պաշտոնատար անձինք իրավունք ունեն պաշտպանին դիմել միայն իրենց՝ որպես ֆիզիկական անձանց, խախտված իրավունքների հիմնարար ազատությունների պաշտպանության նպատակով: Այս դեպքում Ռուբեն Հակոբյանը ոչ թե դիմել է որպես ֆիզիկական անձ, այլ որպես պաշտոնատար անձ և դիմել է «Ժառանգություն» խմբակցության անունից, բայց միաժամանակ մենք իրեն տեղյակ ենք պահել, որ գիտակցում ենք իր կողմից ներկայացված խնդրի կարևորությունը և պատրաստակամ ենք իրավական հիմնավոր փաստարկների ներկայացման դեպքում դիմել ՍԴ», - ասաց Աբգարյանը:

Վերջինիս խոսքերով՝ Ռուբեն Հակոբյանին ներկայացվել է փոքր միջազգային փորձ՝ Հունաստանի գործերից թիվ 42.202.07 գործը, որտեղ ասվում է, որ պետության տարածքից դուրս ընտրելու իրավունքը նախատեսող դրույթի գործնականում չկիրառվելու վերաբերյալ սահմանվել է, որ նման դրույթ չնախատեսելը չի հանգեցնում Մարդու իրավունքների եվրոպական կոնվեցիայի խախտման: