Պաշտպանը պարզաբանում է ակնկալում ՊԵԿ–ից

Գևորգ Մնացականյանը Վրաստանի Հանրապետությունից ձեռք է բերել 1996թ.-ի արտադրության Mercedes Benz C 180 մակնիշի ավտոմեքենա՝ 2800 ԱՄՆ դոլար արժեքով:

Ավտոտրանսպորտային միջոցների մաքսային ձևակերպումների մասնագիտացված մաքսատանը սակայն ուղղորդվել են 1996թ.-ի արտադրության Mercedes-Benz C դասի ավտոմեքենաների համար սահմանված խմբային կողմնորոշիչ սակագնով, այն է՝ 3800 ԱՄՆ դոլար, չնայած որ 1998թ.-ի արտադրության Mercedes-Benz C 180 մակնիշի ավտոմեքենայի համար կողմնորոշիչ սակագին է սահմանված 3300 ԱՄՆ դոլարը:

Չհամաձայնվելով իրեն ներկայացրած սակագնի հետ՝ Գևորգ Մնացականյանը ցանկացել է բողոքարկել այն, սակայն հայտարարատուին չի տրամադրվել վերադաս մաքսային մարմնի կողմից սահմանված մերժման եզրակացությունը, որի հիման վրա քաղաքացին կարող է բողոքարկել իրեն ներկայացված սակագինը: Պաշտպանին ուղղված իր դիմումով հայտնել է Գևորգ Մնացականյանը:

Քաղաքացին հնարավոր տույժերից խուսափելու նպատակով վճարել է մաքսազերծման արժեքը (ըստ Մաքսային օրենսգրքի քաղաքացին համապատասխան մաքսազերծման հետ համաձայն չլինելու և մաքսազերծումը չիրականացնելու դեպքում ենթարկվում է տույժի: Միաժամանակ, Մաքսային օրենսդրությունը հնարավորություն է ընձեռում քաղաքացուն տույժերից խուսափելու համար իր բողոքը հայտնել մաքսազերծումն իրականացնելուց հետո, և բողոքի հիմնավորված լինելու դեպքում մաքսազերծման գումարը փոխհատուցվում է) և առանձին դիմումով բողոք ներկայացրել Պետական եկամուտների կոմիտե:

Սակայն եկամուտների կոմիտեն մերժել է քաղաքացու դիմումի քննարկումը՝ պատճառաբանելով, որ մերժման եզրակացության բացակայության պարագայում քաղաքացու կողմից մեքենայի մաքսազերծումն արդեն իսկ նշանակում է, որ նա համաձայն է եղել իրեն ներկայացրած սակագնի հետ:

Պաշտպանը գրություն է ուղարկել Պետական եկամուտների կոմիտեի նախագահին՝ խնդրելով պարզաբանել մերժման եզրակացության չտրամադրման պատճառները:

Դիմողի անուն-ազգանունը փոխված է: