«Մենք պատրաստ ենք և բերելու ենք որակական փոփոխություն». Վլադիմիր Գասպարյան (տեսանյութ)

Այսօր Ոստիկանության կենտրոնական շենքում տեղի ունեցավ ՀՀ ոստիկանության ինտերնետային նոր կայքէջի շնորհանդեսը, որին ներկա էին ԵԱՀԿ երևանյան գրասենյակի ղեկավար, դեսպան Անդրեյ Սորոկինը, ՀՀ ոստիկանության պետ, գեներալ-լեյտենանտ Վլադիմիր Գասպարյանը, միջազգային և հասարակական կազմակերպությունների ներկայացուցիչներ:

Ոստիկանապետն իր խոսքում ասաց. «Մենք ամեն ինչ անելու ենք, որ ունենանք այն ոստիկանությունը, որը երազում ենք՝ լավ, ազնիվ ոստիկանություն»։

Lurer.com-ի այն հարցին, թե ինչն է խանգարում ոստիկանությանը լինել լավ, ազնիվ, Վլադիմիր Գասպարյանը պատասխանեց, որ շատ բաներ կարող են խոչընդոտել. «Հարցը դրա մեջ չէ, թե ինչն է խանգարում, հարցը նրանում է, թե ինչքա՞ն ես պատրաստ դրան դիմակայելու և բերելու որակական փոփոխության։ Մենք պատրաստ ենք և բերելու ենք որակական փոփոխության, ուզեն, թե չուզեն և դա անելու ենք օրենքի սահմաններում և մարդուն դնելով առաջին պլան»։

«Բերեմ տարրական օրինակ. հասարակությանը խանգարում է, երբ երթուղային տաքսիները վթարի են ենթարկվում և մահվան ելքով դեպքեր են լինում։ Խանգարում է, երբ երթուղային տաքսիները գերծանրաբեռնված են լինում, երբ 12 ուղևորի փոխարեն 22 ուղևոր են նստում, և բնական է, որ մեքենայի տեխնիկական միջոցները թույլ չեն տալիս, որ արգելակումը ճիշտ լինի, արդյունքում մենք ունենում ենք վթարներ, մահվան ելքով դեպքեր։

Հասարակությունն ընդդիմանում է դրա դիմաց, որ ոստիկանությունը վատ է աշխատում։ Երբ որ ոստիկանությունն սկսում է միջոցառումներ իրականացնել, նույն հասարակությունն ասում է.  «Այս խեղճ երթուղային տաքսիների հետևից եք ընգել»։ Ի՞նչ է եղել որ։ Այ այս ամեն ինչը խանգարում է։ Խնագարում է մեր՝ ի սկզբանե չաշխատելը և խանգարում է հասարակության երկակի կամ եռակի ցանկալի գնահատականներ տալը։ Մենք դա կվերացնենք, երբ սևին սև կասենք, սպիտակին՝ սպիտակ, պատվերներ չենք կատարի և՛ մենք, և՛ դուք։ Այդ դեպքում, ես կարծում եմ, որ մեր հասարակության համար մենք ավելի ընկալելի կլինենք,  իսկ քանի դեռ և՛ մենք և՛ դուք պատվերներ ենք կատարում, կամ մեր ցանկացածն ենք ուզում ներկայացնել, մենք դեռ ունենալու ենք խնդիրներ մեր ցանկալի ոստիկանությունը ունենալու և ցանկալի հասարակության մեջ ինտեգրվելու»,- հավելեց Վլադիմիր Գասպարյանը։

Հարցին, թե Երևանի նախկին փոխոստիկանապետ Ռոբերտ Մելքոնյանին փոխարինող գտել է, պարոն ոստիկանապետն ասաց. «Ես կարծում եմ, որ մենք բավականին լավ կադրեր ունենք։ Ոչ միայն գտել եմ, ես նույնիսկ ընտրության հնարավորություն ունեմ»։

Իսկ որքանո՞վ կազդի նրա բացակայությունը համակարգի վրա հարցին ի պատասխան նա նշեց. «Անփոխարինելի մարդիկ չկան, ես չեմ կարծում, որ այս կամ այն անձի բացակայությունը ինչ-որ ազդեցություն կթողնի համակարգի վրա։ Մենք ինչ անում ենք, անում ենք աշխատանքային կոլեկտիվով, թիմով, մեր գործընկերներով։ Այ, եթե մեզանից մեկը գրիպով հիվանդ է, ինչ է, երկիրը կանգնելո՞ւ է։ Ոչ մի այդպիսի խնդիր չկա. և՛ դրական կազդի և՛ բացասական կազդի», - ամփոփեց Վլադիմիր Գասպարյանը։

Ազատուհի Արասխանյան