Բորիս Գրիզլովը հրաժարվել է Պետդումայի պատգամավորի մանդատից

«Единая Россия» կուսակցության ղեկավարներից Բորիս Գրիզլովը, ով նաև Պետդումայի V-րդ գումարման ստորին պալատի նախագահն էր, այսօր հայտարարել է, որ հրաժարվում է VI–րդ գումարման Պետդումայի՝ իր պատգամավորական մանդատից։

«Այսօր ես որոշել եմ հրաժարվել պատգամավորական մանդատից», - Գրիզլովի խոսքերը մեջբերում է «Ինտերֆաքս»–ը։

Գրիզլովը նշել է, որ Պետդումայում աշխատելու ութ տարվա փորձ ունի և կարողացել է իրականացնել այն ամենը, ինչ որ նախատեսված է եղել։

«Չնայած օրենքը չի պարտադրում որևէ սահմանափակում իմ այս որոշման վերաբերյալ, այնուամենայնիվ, ես հրաժարվում եմ երկրորդ անգամ անընդմեջ ներակայացուցիչների պալատը ղեկավարելուց», - ասել է Գրիզլովը։

«Բայց ես շարունակելու եմ ղեկավարել «Единая Россия»-ի գերագույն խորհուրդը և պատրաստ եմ աշխատել այնտեղ, որտեղ որ նախագահը կորոշի», – ասել է նախկին խոսնակը։