Օլիգարխների որսորդը վնասազերծված է

Փառք քեզ, Տեր Աստված, ինչ հանգստություն. վերջապես որսագողը բացահայտված է՝ 1983 թվականին ծնված, Գառնի գյուղի բնակիչ, Ջրային մատակարարումների պահպանության ծառայության աշխատակից Նորիկ Սարգսյանն է։ Դեպքից ընդամենը երեք օր անց ՀՀ ոստիկանության քրեական հետախուզության գլխավոր վարչության, Արմավիրի մարզային վարչության ու Արտաշատի բաժնի ծառայողների համատեղ օպերատիվ-հետախուզական ծավալուն միջոցառումների շնորհիվ լուծվեց այդքան մեծ հնչեղություն ստացած խնդիրը, ելքը որակվեց իբրև իրական հանցագործի բացահայտում։ Նորիկ Սարգսյանն է իրականում հանցագործության հեղինակը, թե՝ ոչ, կպարզեն համապատասխան մարմինները համապատասխան միջոցներով։ Նորիկի մոր համոզմամբ՝ նրանից կարող են կորզել ձեռնտու պատասխաններ հարցաքննման ընթացքում ճնշում կիրառելու միջոցով։ Այդ իսկ պատճառով պնդում են, որ Նորիկին հատկացնեն փաստաբան, որպեսզի կեղծիքերից ինչքան հնարավոր է զերծ մնան։

Լավ առիթ ու հանկարծ միանգամից բոլորը վերածվեցին բնապահպան ակտիվիստների։ Բոլորը սկսեցին գրել, քննադատել ու քարկոծել «որսագողին»՝ հարցին մոտենալով զուտ ՀԱՅԻ տեսանկյունից՝ «Դեպք ա, գրանցվել ա, վատ բան ա, ինչի՞ չքննադատենք» սկզբունքով։ Հարց է առաջանում՝ արդյո՞ք սա միակ դեպքն է, որ գրանցվել է, մի՞թե մեր օրինապահներն այդքան օպերատիվ և առանց բացթողումների են աշխատում, իսկ ինչո՞ւ չէ, երևի. Եվրոպա ենք ձգտում, չէ։

Lurer.com-ի  հավաստի աղբյուրների փոխանցմամբ՝ որսագող և տվյալ պահին միակ մեղադրյալ համարվող Նորիկ Սարգսյանը բազմաթիվ անգամներ կատարել է հայ օլիգարխների պատվերները, որոնք կամ հոգնել են տնային ու «հասարակ» կենդանիների, օրինակ՝ այդքան արդիական դարձած գոմեշի միս ուտելուց, կամ էլ նոր տան պատերը բեզոարյան այծի կամ 25 կիլոգրամանոց կովկասյան արջի քոթոթի մարմնի մասերով զարդարելուց։ Հետաքրքրված չենք օլիգարխների քմահաճույքներով, այդ իսկ պատճառով էլ զերծ կմնանք նրանց պատվերները մեկնաբանելուց։

Գևորգ Ավետիսյան