Ալլա Պուգաչովան հրաժարվել է Պրոխորովի նախընտրական շտաբը ղեկավարելու առաջարկից

Երգչուհի Ալլա Պուգաչովան չի ղեկավարի միլիարդատեր Միխայիլ Պրոխորովի նախընտրական շտաբը, ով օրեր առաջ հայտարարել էր 2012թ–ի մարտի 4–ին կայանալիք ՌԴ նախագահական ընտրություններին իր թեկնածությունն առաջադրելու մասին։ Այս մասին այսօր Պրոխորովը հայտնել է իր թեկնածությունը սատարող մարդկանց հետ հանդիպման ժամանակ։  

Հանդիպումը տեղի է ունեցել ՌԴ կառավարությանը կից Մոսկվայի տնտեսագիտական համալսարանում։ Պրոխորովը նշել է, որ այս հանդիպումն իր համար խորհրդանշական է, քանի որ ինքն այս համալսարանում է սովորել։

Միլիարդատեր թեկնածուն հավաքվածների ուշադրությունը հրավիրել է մի փաստի վրա՝ հիշեցնելով, որ «Единой Россия» կուսակցությունից նախագահի թեկնածու առաջադրված վարչապետ Վլադիմիր Պուտինի նախընտրական շտաբը ղեկավարում է ռեժիսոր Ստանիսլավ Գովորուխինը, իսկ Սերգեյ Միրոնովի նախընտրական շտաբը՝ դերասանուհի Ռիմա Մարկովան։

«Եվ հիմա օդում սավառնում է այն հարցը, թե ով է գլխավորելու իմ նախընտրական շտաբը»,– ասել է Պրոխորովը։ Վերջինս ասել է, որ հանդիպել է Պուգաչովայի հետ այդ հարցի շուրջ զրուցելու. «Ալլան ինձ ամենայն ուշադրությամբ լսեց և ասաց. «այդ թեմայի մասին նույնիսկ մի՛ փորձիր կատակել»», – խոստովանել է Պրոխորովը։

«Ես ձեզ, հավանաբար շատ կհիասթափեցնեմ, բայց Ալլա Պուգաչովան չի՛ ղեկավարելու իմ նախընտրական շտաբը»,- ասել է հանդիպման մասնակիցներին Միխայիլ Պրոխորովը։