Վարդան Օսկանյանը գործում դեռևս ներգրավված չէ որպես մեղադրյալ. ԱԱԾ

ՀՀ Ազգային ժողովը նախօրեին բավարարեց գլխավոր դատախազ Աղվան Հովսեփյանի կողմից ներկայացված միջնորդությունը` ԲՀԿ խմբակցության անդամ, ՀՀ նախկին արտգործնախարար Վարդան Օսկանյանին անձեռնմխելիությունից զրկելու վերաբերյալ։

Վարդան Օսկանյանը գործում դեռևս ներգրավված չէ որպես մեղադրյալ: Այս մասին Լուրեր.com–ի հետ զրույցում հայտնեցին Ազգային անվտանգության ծառայության մամուլի բաժնից։

Հիշեցնենք, որ ՀՀ գլխավոր դատախազ Աղվան Հովսեփյանն Ազգային Ժողով էր ներկայացրել միջնորդագիր՝ ՀՀ ԱԺ պատգամավոր Վարդան Օսկանյանին ՀՀ կառավարությանն առընթեր ազգային անվտանգության ծառայության քննչական վարչության վարույթում քննվող քրեական գործով որպես մեղադրյալ ներգրավելու համաձայնություն տալու մասին:

Նշենք նաև, որ ԱԺ–ում 129 պատգամավորներից 71-ը մասնակցել էին քվերակությանը: ՀԱԿ, ԲՀԿ, ՀՅԴ և «Ժառանգություն» կուսակցությունները բոյկոտել էին քվեարկությունը։

Քվեաթերթիկներից մեկը համարվել էր անվավեր, որտեղ նշված էր եղել և՛ դեմ տարբերակը, և՛ կողմ տարբերակը:

Քվեարկության արդյունքների համաձայն՝ 64 պատգամավոր քվեարկել էր կողմ, իսկ 6–ը՝ դեմ: