Հայաստանում անվտանգային մարտահրավերները փոխվել են, իրավիճակը շատ ավելի վատթարացել է․ Գեղամ Մանուկյան

Հայաստանում անվտանգային մարտահրավերները փոխվել են, և իրավիճակն այս պահին շատ ավելի վատթարացել է, այս մասին Հանրային հեռուստաընկերության «Հարցազրույց Պետրոս Ղազարյանի հետ» հաղորդաշարի ժամանակ ասել է ՀՀ ԱԺ «Հայաստան» խմբակցության պատգամավոր Գեղամ Մանուկյանը՝ անդրադառնալով հաղորդավարի դիտարկմանը, թե երկրի անվտանգային մարտահրավերները չեն փոխվել։

«Համաձայն չեմ, որ չեն փոխվել։ Հիմա շատ ավելի վտանգավոր է դառնում, իշխանության գործողություններն արտաքին ճակատում, արցախյան հարցում իշխանության դիրքորոշումները»,– ասել է պատգամավորը։

Հարցին, թե արդյոք իշխանության դիրքորոշումը փոխվել է այս հարցում, Գեղամ Մանուկյանը դրական պատասխան է տվել։ «Այո, վստահաբար։ Գիտեք, 2020 թվականին «Արցախը Հայաստան է և վերջ» կարգախոսը բղավող Նիկոլ Փաշինյանը, իշխանության ներկայացուցիչները 2022 թվականին այլևս խուսափում են հստակ մի հարցի պատասխանել՝ արդյո՞ք իրենք պատկերացնում են Արցախի ապագան Ադրբեջանի կազմում»,– ասել է նա։

Պետրոս Ղազարյանի դիտարկմանը, որ ընդդիմությունը իշխանությանը մեղադրել է նրանում, որ իշխանության կողմից նման հայտարարությունը հանգեցրեց պատերազմի և, ըստ նրա, իշխանությունը ականջալուր է եղել ընդդիմադիրներին և արել հետևություններ, Գեղամ Մանուկյանը պատասխանել է, որ իշխանությունը լավ կաներ այդ ժամանակ լսեր ընդդիմությանը։

«Իշխանությունը, որ մեզ լսեր, այն ժամանակվա այդ պոռոտախոսությունը չէր անի։ Եվ դրանից հետո խուսափել ասել՝ իրենք պատկերացնում են Արցախը Ադրբեջանի կազմում, չի նշանակում զգուշավորություն։ Դա այն կարմիր գծերն են, որ Հայաստանի Հանրապետությունը միշտ պետք է ձևակերպած ունենար»,– ասել է նա՝ հավելելով, որ այսօր Ադրբեջանի հինգ կետանոց պահանջներին ՀՀ իշխանությունները խուսափողական պատասխաններ են տալիս, խոսում են արցախահայության իրավունքների պաշտպանության մասին, որը ինքնին չի ենթադրում Արցախի կարգավիճակի հարց։

Պատգամավորը նշել է, որ ՀՀ իշխանությունների խուսափողական պատասխանները Ադրբեջանին հետագայում մանևրելու տեղ են թողնում։ Ի պատասխան, հաղորդավարի դիտարկմանը, որ ընդդիմությունը չի ընդունում իշխանությունների հրավերը, խուսափում է  հանդիպել և քննարկել Ադրբեջանի ներկայացրած հինգ կետերի վերաբերյալ հարցերը, Գեղամ Մանուկյանն ասել է, որ չեն ընդունելու վարչապետի հետ առանձին հանդիպելու առաջարկը, վարչապետը պետք է գա և բոլոր պատգամավորների ներկայությամբ քննարկի այդ հարցերը։  

«Իմաստը հետևյալն է․ մեկ անգամ Նիկոլ Փաշինյանը փակ դռների հետևում, այսպես կոչեմ, ընդդիմության հետ 2020 թվականի մայիսին հանդիպել էր, Էդմոն Մարուքյանի հետ սուրճ էր խմել, Էդմոն Մարուքյանն էլ դուրս եկավ և հայտարարեց, որ մենք բավարարված ենք, Արցախի հարցում վտանգներ չենք տեսնում»,– ասել է նա՝ նկատի ունենալով, որ մի քանի ամիս անց բռնկվեց Արցախի 44-օրյա պատերազմը։

Գեղամ Մանուկյանը նաև նշել է, որ գործադիրի ղեկավարը նման հարցերը ոչ թե այս կամ այն սենյակում այս կամ այն ուժի հետ առանձին պետք է քննարկի, այլ գա Ազգային ժողով։