Կալանավորվել է Խաչիկյանի գործով 4-րդ մասնակիցը

Սոցիալական ոլորտի չարաշահումների գործով ՀՀ սոցիալական ապահովության պետական ծառայության վճարումների ծառայության առաջատար մասնագետ-գանձապահ Վիգեն Գևորգյանը ևս կալանավորվել է: Այս մասին «Փաստինֆո»-ի թղթակցին հայտնել են ՀՀ ոստիկանության հասարակայնության հետ կապերի և լրատվության վարչությունից: Նրան մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով՝ կազմակերպված խմբի կողմից խոշոր չափերով կատարված յուրացում և վատնում:

Ավելի վաղ կալանավորվել էին ՀՀ սոցիալական ապահովության պետական ծառայության նախկին պետ Վազգեն Խաչիկյանը, կենսաթոշակային ապահովության և առանձին ծրագրերի վարչության պետ Աշոտ Աբրահամյանը և վճարումների ծառայության պետ Հովհաննես Գրիգորյանը:

Վազգեն Խաչիկյանին մեղադրանք է առաջադրվել կազմակերպված խմբով յուրացման եղանակով 211.680.984 ՀՀ դրամ և խարդախությամբ 29.000.000 դրամ գումարներ հափշտակելու, ինչպես նաև պաշտոնեական կեղծիք կատարելու համար՝ ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետեր, 178-րդ հոդվածի 3-րդ մասի 1-ին կետ և 314-րդ հոդված, կենսաթոշակային ապահովության և առանձին ծրագրերի վարչության պետ Աշոտ Աբրահամյանին և վճարումների ծառայության պետ Հովհաննես Գրիգորյանին՝ ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով, 314-րդ հոդվածով՝ կազմակերպված խմբի կողմից խոշոր չափերով կատարված յուրացում և վատնում, Պաշտոնեական կեղծիք: