«Օգնեք մեզ արթնացնել մեր այն հայրենակիցներին, որոնք դեռ չեն արթնացել». Արամ Վարդևանյանի կոչը

«Մեր այն հայրենակիցները, որոնք մտածում են, որ տանից դուրս գալով արդյոք մի բան կփոխվի, թե ոչ, թող վստահ լինեն ամեն մի փոքր գործողությամբ նույնիսկ պարզապես տանից դուրս գալով, միասին քայլելով, շփվելով արդեն իսկ ինչ-որ բան փոխում են, վստահ եղեք դրանում: Իսկապես օգնեք մեզ արթնացնել մեր այն հայրենակիցներին, ովքեր դեռ չեն արթնացել». Այս մասին ֆեյսբուքյան ուղիղ եթերում ասաց «Հայաստան» դաշինքի պատգամավոր Արամ Վարդևանյանը։

«Ես տեղյակ եմ, թե որքան ոստիկաններ իրենց գործընկերների արարքներից, մեղմ ասած,  վատ են զգում: Քայլերթի ընթացքում մեզ մոտեցավ մասնակիցներից մեկը եւ ազվորեն ցանկացած հայտնել, որ 2021-ի հունիսի 20-ի ընտրություններին իր ձայնը տվել էր Նիկոլ Փաշինյանին: Նա ասաց, որ գիտակցում է, որ սխալվել է:

Ոչ թե մեր հայրենակիցը սխալվել է, այլ նրան խաբել են: Խաբել են 2018-ին, 2019-ին, 2020-ին ու 2021-ին: 2021-ին նույն Նիկոլ Փաշինյանն այլ խոստումներ էր տալիս, ասում էր՝ պայքարելու է Շուշիի, Հադրութի դեօկուպացիայի համար, որ Արցախի կարգավիճակի համար կռիվ է տալու, իսկ այսօր լրիվ ուրիշ բաներ է խոսում:

Երբ մենք ասում ենք՝ այս իշխանությունն այլեւս չունի լեգիտիմությունը, չունի այլեւս այն մանդատը, որ հայցել էր 2021-ի ընտրություններին, դա փաստական հանգամանքներով է պայմանավորված: Մեր այս հայրենակցի պատմությունը շատ խոսուն փաստ է»,- նշեց Վարդևանյանը:

Վարդեւանյանը տեղեկացրեց, որ իրենց քայլերթին մասնակցում էին մարդիկ, որոնք եկել էին նույնիսկ Լոս Անջելեսից: