Մեծ գումարներ է հափշտակել՝ խաբելով բնակարան ձեռք բերել ցանկացողների

Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանը հիմնավորված է համարել խաբեության եղանակով առանձնապես խոշոր չափերի գումարներ հափշտակելու համար քաղաքացի Ա. Քարամովին առաջադրված մեղադրանքը եւ դատապարտել ազատազրկման:

Դատարանում հետազոտված եւ հիմնավոր համարված ապացույցների համաձայն՝ քաղաքացի Ա. Քարամովը առանձնապես խոշոր չափերի գումար հափշտակելու դիտավորությամբ, փախստականների բնակարանային խնդիրներով զբաղվող պետական որեւէ հաստատությունում չաշխատելով, սակայն ներկայանալով որպես տվյալ ոլորտում գործնական կապեր ունեցող նախկին աշխատակից, թվով 4 անձանց հավաստիացրել է, թե ինքը կարող է նրանց օգնել՝ բնակարան ստանալու հարցում:

Պետական բնակարանային ֆոնդից Երեւան քաղաքում բնակարան ձեռք բերելու գործընթացը կազմակերպելու պատրվակով Ա. Քարամովը մեկ փախստականից, ինչպես նաեւ ՀՀ երեք քաղաքացիներից պահանջել եւ ստացել է առանձնապես խոշոր չափերի գումար՝ այն ծախսելով անձնական կարիքների համար:

Դատարանում Ա. Քարամովն ընդունել է իրեն առաջադրված մեղադրանքը եւ խնդրել կիրառել արագացված դատաքննության կարգ:

Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանի դատավճռով Ա. Քարամովը մեղավոր է ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ին կետով եւ դատապարտվել ազատազրկման՝ 5 տարի ժամկետով: