Սկսվել է «Հարսնաքար»–ի գործով դատավարությունը

Այսօր տեղի ունեցավ «Հարսնաքար»-ի գործով հերթական դատավարությունը։ Սկզբում դատական նիստն ընդմիջվեց, քանի որ դատական նիստից ուշացել էր ամբաստանյալ Գարիկ Մարգարյանի պաշտպան Մարգարիտա Թովմասյանը։ 

Դատական նիստի վերսկսելուց հետո պաշտպանը որպես ուշացման պատճառ նշեց, որ ծանրաբեռնված է եղել, հետո էլ հայտնվել խցանման մեջ։ Սակայն դատավոր Դավիթ Հարությունյանը դատական պատժամիջոց չկիրառեց։

Նիստի ընթացքում դատավորը նշեց, որ քանի որ ամբաստանյալ Արման Բաղդասարյանը նախորդ դատական նիստի ընթացքում հրաժարվել էր իր պաշտպան Հովհաննես Հարությունյանի պաշտպանությունից և գործում նրա պաշտպանությունն իրականացնելու համար ներգրավվել էր նոր պաշտպան՝ Վաղարշակ Գևորգյանը, ով նշել էր, որ դեռ չի ծանոթացել գործի նյութերին և պահանջել էր ողջամիտ ժամկետ՝ ոչ շուտ, քան նախօրոք նշանակված ամսի 10-ի նիստը։

Հիշեցնենք, որ դատախազ Արթուր Դավթյանը յոթ օրը համարել էր ողջամիտ ժամանակ։ Դատարանը ժամանակ էր տրամադրել Գևորգյանին, մինչև հաջորդ դատական նիստը, բայց պաշտպանն ասել էր, որ մինչև մյուս դատական նիստը չի հասցնի ծանոթանալ գործի ամբողջական նյութերին։ Դատարանն իր որոշումն արդեն կայացրել էր և դրանից որոշումը չէր փոխվել։

Ամբաստանյալ Բաղդասարյանը դատարանին դիմում էր ներկայացրել, համաձայն որի հրաժարվում է իր պաշտպան Վաղարշակ Գևորգյանի պաշտպանությունից, քանի որ չի ցանկանում իր պատճառով ևս մեկ դատական նիստ հետաձգվի, որպես իր ներկայացուցիչ գործում Վաղարշակ Գևորգյանի փոխարեն ներգրավվեց Միհրան Պողոսյանը։ 

Միհրան Պողոսյանը դատարանից խնդրեց 15 րոպե ընդմիջում գործի երկրորդ հատորի հետ ծանոթանալու համար։

Դատական նիստը կրկին ընդմիջվեց։

Հիշեցնենք, որ դատավարությունը նշանակվել է հուլիսի 17-ին նախկին ՀՀԿ պատգամավոր Ռուբեն Հայրապետյանին պատկանող «Հարսնաքար» համալիրում Հայրապետյանի թիկնազորի կողմից խոշտանգումների ենթարկված և հուլիսի 29-ի մահացած ռազմական բժիշկ Վահե Ավետյանի սպանության գործով։