Կադաստրի պետական կոմիտեն չի գրանցում քաղաքացու շինությունները

1993թ.-ին Էջմիածին քաղաքում Կարեն Սանթրոսյանին անհատույց տրվել է տնամերձ հողամաս` սեփականության իրավունքով: 2012թ-ին Էջմիածնի քաղաքապետի որոշմամբ Սանթրոսյանի տնամերձ հողամասի վրա ինքնակամ կառուցված բնակելի տունը և օժանդակ շինությունները օրինական են ճանաչվել: Բայց երբ քաղաքացին շինությունների գրանցման համար դիմել է Անշարժ գույքի կադաստրի պետական կոմիտե` մերժում է ստացել հետևյալ պատճառաբանությամբ, որ տվյալ հողամասը Սանթրոսյանին հատկացվել 1993թ. դեկտեմբերի 20-ի որոշմամբ և քանի որ այդ ժամանակ արդեն հողերի անհատույց սեփականաշնորհման գործընթացն ավարտված է եղել, ուստի հիմա անհրաժեշտ է ներկայացնել հողամասի գնման վերաբերյալ փաստաթղթեր:

Պաշտպանին ուղղված իր դիմումով Կարեն Սանթրոսյանը խնդրում է լուծել հողամասի գրանցման հետ կապված հարցը:

Խնդրի առնչությամբ պարզաբանումներ ստանալու նպատակով Պաշտպանը գրություն է ուղարկել անշարժ գույքի կադաստրի պետական կոմիտե:

Հավելենք, որ համաձայն ՀՀ նախկին հողային օրենսգրքի և ուժը կորցրած ճանաչված «Գյուղացիական և գյուղացիական կոլեկտիվ տնտեսությունների մասին» ՀՀ օրենքի` 1993 թվականին քաղաքացիներին տնամերձ (օժանդակ) հողամասերը որպես սեփականություն տրամադրվել են անհատույց, բացառությամբ օրենքով նախատեսված դեպքերի:

Քաղաքացու անուն-ազգանունը փոխված է: