ԲՀԿ-ական նախկին նախարարը հարցաքննության է կանչվել որպես վկա

Քաղաքաշինության նախկին նախարար, ԲՀԿ-ական Վարդան Վարդանյանն այսօր կանչվել է Ոստիկանության քննչական գլխավոր վարչություն որպես վկա: Այս մասին Լուրեր.com-ի հետ զրույցում ասաց Ոստիկանության հասարակայնության հետ կապերի և լրատվության վարչության աշխատակից Արմեն Մալխասյանը:

Նշենք, որ նախարարը հարցաքննության է հրավիրվել Հայաստանի ազգային գրադարանի հիմնանորոգման աշխատանքների ընթացքում արձանագրված չարաշահումների դեպքերի առթիվ ՀՀ գլխավոր դատախազության պետական շահերի պաշտպանության վարչությունում 2012թ. սեպտեմբերի 25-ին հարուցված քրեական գործի շրջանակներում:

Հիշեցնենք նաև, որ ըստ դատախազության տարածած հաղորդագրության՝ նախապատրաստված նյութերով մասնավորապես պարզվել է, որ 2005-ին, այնուհետև՝ 2008-2010թթ. ընթացքում կազմված, ապա լրամշակված նախագծանախահաշվային փաստաթղթերի հիման վրա իրականացվող աշխատանքները նախ կազմել են 305 000 000 դրամ, ապա՝ 709 641 000 դրամ: Նախաքննության տվյալներով՝ գրադարանի հիմնանորոգման աշխատանքները կատարվել են քաղաքաշինական նորմերի խախտումներով: Բացի այդ՝ աշխատանքներն իրականացնող ՍՊ ընկերությունների կողմից կազմված կատարողական ու ավարտական ակտերում օգտագործված նյութերի և ապրանքների ծագումն ու բնութագիրը փոփոխելու, կատարված աշխատանքների ծավալները հավելագրելու միջոցով յուրացման եղանակով հափշտակվել է առանձնապես խոշոր չափերի գումար: Իսկ համապատասխան պաշտոնատար անձինք ստորագրել են հավելագրումներով կազմված կատարողական ու ավարտական ակտերը և հիմնանորոգման աշխատանքներն ամբողջությամբ և պատշաճ կատարված լինելու մասին տվել դրական եզրակացություններ:

Արդյունքում պետությանը պատճառվել է առանձնապես խոշոր չափերի հասնող վնաս: Նշված գործի շրջանակներում սեպտեմբերի 28-ին ձերբակալվել, ապա կալանավորվել է քաղաքաշինության նախարարության շինարարության քաղաքականության վարչության նախկին պետ Գոռ Քամալյանը:

Նա մեղադրվում է պաշտոնական լիազորությունները չարաշահելու մեջ՝ նախատեսված ՀՀ քրեական օրենսգրքի 308-րդ հոդվածի 2-րդ մասով: