Դատարանը մերժել է Լուժկովի հայցը Նարիշկինի դեմ

Մոսկվայի դատարանն այսօր մերժել է Մոսկվայի նախկին քաղաքապետ Յուրի Լուժկովի՝ իր պատիվն ու արժանապատվությունը վիրավորելու համար Սերգեյ Նարիշկինի դեմ ուղղված հայցը։ Այս մասին «ИТАР-ТАСС»–ի թղթակցին է հաղորդել հայցվորի փաստաբան Ալեքսեյ Մելնիկովը։

«Այսօրվա որոշումը մեզ համար անակնկալ չէր, բայց մենք պատրաստվում ենք բողոքարկել Մոսկվայի քաղաքային դատարանի որոշումը», - ասել է փաստաբանը։

Ռուսաստանի նախագահի աշխատակազմի ղեկավար Սերգեյ Նարիշկինի դեմ Լուժկովի հայցը, պայմանավորված է եղել Նարիշկինի կողմից Լուժկովի օրոք Մոսկվայի իշխանություններին կոռումպացվածության մեջ մեղադրելու համար։

Լուժկովն այդ մեղադրանքի համար դիմել է դատարան՝ Նարիշկինից պահանջելով 1 մլն դոլար փոխհատուցում՝ իր անունը արատավորելու և արժանապատվությունը վնասող հայտարարություն անելու համար։

Նախագահի աշխատակազմի ղեկավարը չի ընդունել նախկին քաղաքապետի կողմից իր դեմ ուղղված մեղադրանքները՝ հայտարարելով, որ Լուժկովի քաղաքապետ եղած ժամանակ կոռուպցիայի բարձր մակարդակը ցույց է տվել վիճակագրությունը։