Վլադիմիր Պուտին. «Եթե Կովկասին չֆինանսավորենք, պատերազմ կլինի»

Ռուսաստանի վարչապետ Վլադիմիր Պուտինը կտրականապես իր անհամաձայնությունն է հայտնել այն հարցի շուրջ, որ մարդիկ ընդդիմանում են Հյուսիսային Կովկասում գտնվող հանրապետությունների ֆինանսավորմանը։

Այդ տարածաշրջանի երկրների ֆինանսավորումը դադարեցնելու մասին կոչեր հաճախ հնչեցվում են Ռուսաստանի ընդդիմության ներկայացուցիչների կողմից։ Նման առաջարկներ են եղել դեկտեմբերի 15–ին Վլադիմիր Պուտինի քաղաքացիների հետ ուղիղ եթերում հարց ու պատասխանի ժամանակ: 

«Դա նշանակում է, որ նոր աշխատատեղերի ստեղծման համար պետք չէ ներդրումներ իրականացնել այդ հանրապետություններում։ Այդ դեպքում Հյուսիսային Կովկասի երիտասարդության մեծ մասը կլքի իր բնակավայրը և կգնա ավելի մեծ քաղաքներ ապրելու համար, որն էլ իր հերթին լուրջ խնդիրներ է ստեղծում մեծ քաղաքաների համար», – ասել է վարչապետ Վլադիմիր Պուտինը Գուդերմեսում Հյուսիսային Կովկասի դաշնային շրջանի զարգացման թեմայի շուրջ կայացած հանդիպման ժամանակ։

«Ի՞նչ անենք, վտարե՞նք նրանց, բայց ու՞ր ուղարկենք։ Այդպիսով նրանք կհամալրեն հանցագործների շարքերը», – առաջարկել է Պուտինը։ Ի վերջո, ըստ Պուտինի՝ դա կբերի տարածաշրջանում իրավիճակի սրման. «կշարունակվի եղբայրասպան պատերազմը», – ասել է Պուտինը։ 

Ռուսաստանի վարչապետն ասել է, որ եթե Կովկասը Ռուսաստանից առանձնանա, ինչպես նման առաջարկությամբ հանդես են գալիս ազգայնական շարժումների մի քանի առաջնորդներ, ապա դա կլինի այդ հանրապետությունների ավարտի սկիզբը»։

«Եթե դա տեղի է ունենում այստեղ, հենց այս պահին կան նրանք, ովքեր ցանկանում են նույնն անել Ռուսաստանի այլ տարածքային ստորաբաժանումներում», - զգուշացրել է վարչապետը: Ըստ նրա` դա ողբերգություն կլինի:

 Հաղորդում է «РБК»–ն։