Մերիլին Մենսոնին դատի են տվել՝ անչափահասի նկատմամբ սեռական ոտնձգությունների համար․ Rolling Stone

Երաժիշտ Մերիլին Մենսոնին դատի են տվել 1990-ականներին անչափահասի նկատմամբ սեռական ոտնձգությունների համար, հայտնում է Rolling Stone-ը։

Այս հայցով պաշտպաններ կլինեն նաև այն լեյբլները, որոնց հետ երաժիշտը համագործակցել է՝ Interscope-ը և Nothing Records-ը։ Ենթադրվում է, որ իր կարիերայի սկզբում Մենսոնը հարաբերությունների մեջ է մտել անչափահասի հետ, ով նրան մեղադրում է ֆիզիկական և էմոցիոնալ բռնության մեջ:

Ենթադրյալ տուժողը պատմել է, որ երաժշտի հետ առաջին անգամ հանդիպել է 1995 թվականին Դալլասում համերգից հետո․ այդ ժամանակ ինքը 16 տարեկան էր։ Մենսոնը նրան և այլ երիտասարդ աղջիկների հրավիրել է իր ավտոբուս, որտեղ «սեքսուալ բնույթի հանցավոր գործողություններ է կատարել աղջկա նկատմամբ, որն այդ ժամանակ կույս էր»։ Դրանից հետո Մենսոնը նրանից պահանջել է «գրողի ծոցը գնալ» և սպառնացել, որ կսպանի նրան և նրա ընտանիքին, եթե վերջինս խոսի դեպքի մասին։

Տուժողը խոստովանել է, որ դրանից հետո սկսել է խնդիրներ ունենալ թմրանյութերի և ալկոհոլի հետ կապված։ Միևնույն ժամանակ, ռոքերը պարբերաբար գրում և զանգահարում էր իրեն՝ խնդրելով ուղարկել իր կամ ընկերների անկեղծ լուսանկարները։

Ավելի ուշ Մենսոնը համոզել է աղջկան գալ համերգի Նոր Օռլեանում, որտեղ կրկին բռնաբարել է նրան։ Այնուհետև, հայցվորն սկսել է ուղեկցել արտիստին հյուրախաղերի ժամանակ, որտեղ վերջինս անընդհատ ստիպել է նրան սեքսով զբաղվել ոչ միայն իր, այլև խմբի այլ անդամների և օգնականների հետ: Աղջիկը պատմել է, որ Մենսոնը վերահսկել է իրեն և դրդել իրեն մեկուսանալ սեփական ընտանիքից։