Դոնալդ Թրամփը քննադատել է երգչուհի Ռիհաննային

ԱՄՆ նախկին նախագահ Դոնալդ Թրամփը քննադատել է բարբադոսցի երգչուհի Ռիհաննային Super Bowl-ում նրա ելույթից առաջ։ Այս մասին հայտնում է Independent-ը։

Երկուշաբթի լույս փետրվարի 13-ի գիշերը կկայանա Ֆուտբոլի ազգային լիգայի ամերիկյան ֆուտբոլի մրցաշրջանի 57-րդ եզրափակիչ խաղը։ Ռիհաննան կերգի Super Bowl-ի ընդմիջման ժամանակ, որը նրա առաջին ելույթն է վերջին հինգ տարվա ընթացքում: Բարբադոսցի երգչուհու վերադարձին բեմ շատերն են սպասում, բացառությամբ Դոնալդ Թրամփի։

«Առանց իր «ոճաբանի» նա ՈՉԻՆՉ կլիներ: Ամեն ինչ վատ է, և ՏԱՂԱՆԴ ՉԿԱ», - գրել է ԱՄՆ նախկին նախագահն իր «Truth Social» սոցիալական ցանցում։

Երբ Դոնալդ Թրամփը նախագահ էր, Ռիհաննան կոշտ քննադատությամբ էր հանդես եկել նրա նկատմամբ։ 2017 թվականին երգչուհին ամերիկյան այն ժամանակվա առաջնորդին անվանել էր «անբարոյական խոզ»՝ ներգաղթային քաղաքականության խստացման պատճառով։ 

2018 թվականին քաղաքական հանրահավաքներից մեկի ժամանակ Դոնալդ Թրամփը օգտագործել էր Ռիհաննայի «Don't Stop the Music» երգը, այնուհետև երգչուհու փաստաբանները համապատասխան նամակով սպառնացել էին նրան։