ՄԻԵԴ-ում 3 անհատական գործ մտել է ակտիվ կոմունիկացիայի փուլ. Սիրանուշ Սահակյան. News.am

Մարդու իրավունքների Եվրոպական դատարանում (ՄԻԵԴ) երեք անհատական գործ մտել է ակտիվ կոմունիկացիայի փուլ: Այս մասին NEWS.am-ի հետ զրույցում ասաց Միազգային եւ համեմատական իրավունքի կենտրոնի նախագահ Սիրանուշ Սահակյանը:

Սահակյանն ասաց, որ բուն գործի էության վերաբերյալ դատարանը հարցադրումներ է ուղղել Ադրբեջանին.

«Եթե նախկին գործընթացի շրջանակում հարցադրումներն առնչվում էին բացառապես անհապաղ միջոցների կիրառությանը, ապա ներկայումս էության վերաբերյալ հարցադրումներ կան: Հաշվի առնելով, որ գործընթացը տեղաշարժվել է, ակնկալիք ունենք, որ մյուս անհատական գործերով կարճ ժամանակ անց եւս կլինի կոմունիկացիա՝ էության վերաբերյալ: Անհապաղ միջոցները վերացել են այն աձնանց առնչությամբ որոնք հայրենադարձվել են, իսկ նրանք, ովքեր դեռ վերադարձված չեն եւ անկախ նրանից՝ Ադրբեջանն ընդունում է, թե՝ ոչ, անհապաղ միջոցներ շարունակում են գործել»:

Սիրանուշ Սահակյանը նշեց, թե որոնք են այդ երեք գործերը.

«Գործերից մեկը վերաբերում է հայրենադարձված գերու, որը խոշտանգվել է Ադրբեջանում գտնվելու ընթացքում: Մյուսն առնչվում է ռազմագերու գնդակահարությանը Ադրբեջանի զինված ուժերի ներկայացուցիչների կողմից:Երրորդն առնչվում է զինծառայողի մարմնի նկատմամբ ոտնձգությանը: Մարմնի տարբեր մասերի նկատմամբ արվել է միջամտություն եւ ավելին, այդ միջամտությունը ցուցադրող կադրերը լայնորեն տարածվել են, ինչը նաեւ անձանց մասնավոր կյանքի անձեռմխելիությանխնդիրներ է առաջ բերում եւ անհամաչափ ցավ, տառապանք է պատճառում նաեւ հարազատներին»:

Հարցին, թե ո՞ր ժամանակաշրջանի դեպքերին են վերաբերում գործերը Սահակյանն ասաց. «Ունենք գործ, որը վերաբերում է սեպտեմբերյան մարտերին: Ունենք գործ, որն առնվում է բուն 44-օրյա պատերազմին: Ունենք գերեվարման դեպք, որը տեղի է ունեցել մինչեւ պատերազմը»:

Սահակյանն ասաց, որ Եվրոպական դատարանը Ադրբեջանին ժամկետներ է տրամադրել՝ առարկություններ ներկայացնելու համար: