Կալիֆորնիացի ուսուցչուհին հեռացվել է աշխատանքից՝ գենդերային նոր քաղաքականությանը չհետևելու համար

Կալիֆորնիացի ուսուցչուհին կորցրել է աշխատանքը, երբ հրաժարվել է կատարել նահանգի գենդերային քաղաքականությունը՝ վկայակոչելով իր սեփական քրիստոնեական համոզմունքները: Այս մասին հայտնում է Fox News-ը։

Ջեսիկա Տապիասը նախընտրել է չենթարկվել գենդերային նոր քաղաքականությանը և, իր խոսքով, ընտրել է իր հավատքը: Նա հայտնել է, որ նորամուծությունների պատճառով պետք է ընտրեր՝ մնալ քրիստոնյա, թե ուսուցիչ: Նա սխալ է համարում իր պաշտոնանկությունը, որը տեղի է ունեցել հունվարի 31-ին։

Տապիասը ասել է, որ իրեն ստիպել են լքել աշխատանքը Կալիֆորնիայի Ջուրուպա շրջանի դպրոցից, քանի որ չի ցանկացել ձեռնպահ մնալ ծնողների հետ որոշ աշակերտների գենդերային առանձնահատկությունների մասին խոսելուց: Նա նաև հրաժարվել էր աջակցել իր դասարանի աշակերտների գենդերային ինքնությանը:

Կինը նշել է, որ իր համար անհամոզիչ են նոր կանոնները, և ասել է, որ դրանց կիրառման հետ կապված բազմաթիվ խնդիրներ կարող են առաջանալ։ Նա կարծում է, որ երեխայի սեռի մասին տեղեկությունը կարող է ազդել նրա բարօրության վրա, ուստի անհրաժեշտ է ծնողների հետ խոսել փոխված գենդերային կարգավիճակի մասին։ 

Տապիասին, որպես ֆիզկուլտուրայի ուսուցչուհու, հանձնարարվել էր նաև թույլ տալ տղաներին փոխվել աղջիկների հանդերձարանում, սակայն կինը հրաժարվել էր կատարել այդ պահանջը: Նա ասել էր, որ չի փոխի իր համոզմունքները նահանգի նոր օրենքների պատճառով:

«Ես հաստատապես հավատում եմ, որ Աստված ստեղծել է տղամարդու և կնոջ, և դուք այնպիսին եք, ինչպիսին Նա ստեղծել է ձեզ: Եվ երբ ինչ-որ մեկը շփոթված է այս հարցում, ես հավատում եմ, որ դա սուտ է և շփոթմունք սատանայի կողմից», - բացատրել է Տապիասը իր դիրքորոշումը:

Տապիասը դպրոցից իր հեռացումը համարում է կրոնական համոզմունքների վրա հիմնված խտրականություն։ Կինն ասել է, որ փաստաբան է վարձել և մտադիր է դատի տալ շրջանին: