Ձկնորսը 2 ժամ տևած պայքարից հետո 250 կգ-անոց կատվաձուկ է որսացել (լուսանկարներ)

Արգենտինայում 42-ամյա ձկնորս Անդրես Ուիլչենը 2 ժամ տեւած պայքարից հետո հսկայական կատվաձուկ է բռնել։ Այս մասին հայտնում է New York Post-ը։

Տղամարդը գտնվել է նավի վրա Պարանա գետում, որտեղ ձկնորսություն է արել ամբողջ կյանքում։ Հանկարծ թելը ձգվել է, և Ուիլչենը հասկացել է, որ հսկայական ձուկ է բռնել։ Նա սկսել է դրան ջրից հանել, սակայն այն դիմադրում էր։ «Ես պատրաստ էի հանձնվել», - ասում է ձկնորսը: «Այն շատ ուժեղ էր և լողում էր գետի հատակով»: Նա հավելել է, որ կարող էր ջուրն ընկնել, եթե նավակը խարսխված չլիներ։

250 կգ-անոց կարճ պոչով կատվաձկանը բռնելու համար Ուիլչենից պահանջվել է երկու ժամ։ «Ամենադժվարը դրան նավ քարշ տալն էր»,- ասել է տղամարդը ով ստիպված է եղել կենդանուն նավ բարձրացնել ընկերների օգնությամբ: Ձկնորսի խոսքով՝ սա իր երբևէ բռնած ամենամեծ ձուկն է։