Յոթ երեխա ունեցող կինը հնգյակ է լույս աշխարհ բերել

55-ամյա Վինս Քլարկը և 37-ամյա կինը՝ Դոմինիկա Քլարկը, արդեն մեծացնում էին 10 ամսականից մինչև 12 տարեկան յոթ երեխա, երբ որոշեցին ևս մեկ երեխա ունենալ: Կինը հաջողությամբ հղիացել է և շուտով պարզել, որ պետք է ծննդաբերի միանգամից հինգ երեխայի։

Վինսը պատմել է, որ մինչ բեղմնավորումը ինքը և իր կինը հետևել են դիետայի, որը բաղկացած է եղել հյութերից և ցածր կալորիականությամբ մթերքներից։ Նա կարծում է, որ իրենց սննդակարգն ազդել է հայտնված սաղմերի քանակի վրա։

Ըստ բժիշկների՝ հնգյակով հղիանալու նրանց հնարավորությունները 52 միլիոնից մեկն էին: «Մենք ավելի շատ վիճակախաղով հաղթելու շանս ունեինք, քան այս ամբոխը լույս աշխարհ բերելու: Որպես մաթեմատիկոս՝ ինձ դուր է գալիս նման վիճակագրությունը»,- ասել է Դոմինիկան։

Կինը վերջին տասը շաբաթների ընթացքում գտնվում էր հիվանդանոցում բժիշկների հսկողության ներքո և ծննդաբերել է կեսարյան հատումով հղիության 29-րդ շաբաթում: Նորածիններին՝ երեք աղջիկ և երկու տղա, անվանել են Արիաննա Դեյզի, Չարլզ Պատրիկ, Էլիզաբեթ Մեյ, Էվանջելին Ռոուզ և Հենրի Ջեյմս։ Նրանք շնչառական աջակցության կարիք ունեն, ուստի դեռ հիվանդանոցում են։

Դոմինիկան նշել է, որ ծանր ծննդաբերությունից հետո իրեն ավելի լավ է զգում, քան սպասում էր։