Ալիևը նշել է Բաքվի և Թեհրանի միջև հարաբերությունների կարգավորման պայմանը

Ադրբեջանի նախագահ Իլհամ Ալիևը հայտարարել է, որ Բաքվի և Թեհրանի միջև հարաբերությունների կարգավորումը հնարավոր է միայն այն բանից հետո, երբ Իրանի իշխանությունները բացահայտեն և պատասխանատվության ենթարկեն բոլոր նրանց, ովքեր ներգրավված են Իրանում Ադրբեջանի դեսպանատան վրա կատարված «ահաբեկչության» մեջ։

«Դուք գիտեք մեր դեսպանատան դեմ իրականացված ահաբեկչության մասին: Դա կազմակերպված ահաբեկչություն էր Ադրբեջանի դիվանագիտական ​​ներկայացուցչության դեմ։ Ահաբեկչին չէին զինաթափել 30-40 րոպեի ընթացքում, ոստիկանական մեքենաներն ու անվտանգության աշխատակիցները գալիս ու հեռանում էին, բայց նրան երկու անգամ թույլ են տվել մտնել դեսպանատան շենք, սպանել դեսպանատան պահակներից մեկին և վիրավորել ևս երկուսին»,- ասել է Ալիևը ադրբեջանցի լրագրողներին տված հարցազրույցում։

Նրա խոսքով՝ ահաբեկչին զինաթափած պահակներից մեկի խիզախությունը, հնարավոր է, փրկել է տասնյակ ադրբեջանցիների կյանքեր։ «Քանի որ մեր դիվանագետների ընտանիքները, այդ թվում՝ նրանց երեխաները, ապրում էին այս տանը։ Ուստի մենք պահանջում ենք անհապաղ և թափանցիկ հետաքննություն այս գործով։ Այն փաստը, որ ահաբեկիչը ահաբեկչությունից հետո հարցազրույց է տվել իրանական լրատվամիջոցներին, վկայում է այն մասին, որ նա նրանցից մեկն է, ում ուղարկել էին իրանական իսթեբլիշմենթի որոշ ներկայացուցիչներ։ Տարօրինակ էր նաև, որ երկու օր անց նրան մտավոր հետամնաց ճանաչեցին։ Ինչպե՞ս կարող էին այդ փորձաքննությունն այդքան արագ անցկացնել։ Դա քայլ էր, որպեսզի նա կարողանա խուսափել արդարադատությունից»,- ասել է Ալիևը։

Նա հայտարարել է, թե Իրանի կառավարությունը պետք է թափանցիկ հետաքննություն անցկացնի, «մենք պետք է տեղեկացված լինենք այդ մասին, իսկ ահաբեկիչը պետք է պատժվի»։ «Բայց ամենակարևորն այն է, որ նրանք, ովքեր ուղարկել են ահաբեկչին, իրանական իսթեբլիշմենթի ներկայացուցիչները, ովքեր իրականացրել են այս դաժան արարքը Ադրբեջանի դեմ, պետք է պատասխանատվության ենթարկվեն: Միայն դրանից հետո հնարավոր կլինի խոսել  (Իրանի հետ - խմբ․) հարաբերությունների ցանկացած կարգավորման մասին»,- հավելել է Ադրբեջանի ղեկավարը։