63-ամյա բժիշկը կիսվել է այն գաղտնիքներով, որոնք օգնում են իրեն պահպանել երիտասարդ տեսքը

ԱՄՆ Մասաչուսեթս նահանգից 63-ամյա բժիշկ Մարկ Հայմանը նշել է այն գաղտնիքները, որոնք օգնում են իրեն պահպանել երիտասարդ տեսքը և ամուր առողջությունը։ Այս մասին հայտնում է New York Post-ը։

Ըստ Հայմանի՝ իր կենսաբանական տարիքը 20 տարով պակաս է իրականից և ինքն ընդամենը 43 տարեկան է։ Նա կարծում է, որ որոշակի ռեժիմի շնորհիվ է, որ ինքն ավելի երիտասարդ տեսք ունի և իրեն ավելի երիտասարդ է զգում։

Բժիշկը համաձայնել է կիսվել իր առօրյայով։ Նրա խոսքով՝ ինքը արթնանում է առավոտյան ժամը վեցին ու 20 րոպե մեդիտացիա է անում, հետո սուրճ է խմում ու գրում իր օրագրում։ Դրանից հետո Հայմանը անցնում է 30 րոպեանոց ուժային մարզման։

«Ֆիզիկական վարժություններն ամրացնում են մեր հիշողությունը, դարձնում մեզ ավելի եռանդուն, ավելի երջանիկ և ավելի դիմացկուն: Ուսումնասիրությունները ցույց են տալիս, որ ինտենսիվ մարզումները ավելի լավ են օրգանիզմի համար, քան հակադեպրեսանտները»,- ասել է նա՝ հավելելով, որ փորձում է օրական երեք ժամ մարզվել։

Մարզվելուց հետո Հայմանը շոգեբաղնիք է գնում, իսկ հետո անմիջապես սուզվում է սառը ջրի մեջ և նստում դրա մեջ մոտ երեք րոպե: Դրանից հետո բժիշկը նախաճաշի համար սմուզի է պատրաստում, որին ավելացնում է 48 գրամ սպիտակուց, չիայի սերմեր և հատապտուղներ։

Մարզվելուց և առողջ սննդակարգից բացի տղամարդը խոսել է նաև առողջ քնի կարևորության մասին։ Նրա խոսքով՝ քնի պակասը հանգեցնում է օրգանիզմի արագ ծերացման։