«Ադրբեջանը ձգտելու է Հայաստանին պատասխանատվության ենթարկել»․ Բաքվի հայտարարությունը՝ Արդարադատության միջազգային դատարանի որոշման վերաբերյալ
Արտաքին ՔաղաքականԱդրբեջանի ԱԳՆ-ն հայտարարություն է տարածել Արդարադատության միջազգային դատարանի 2023 թվականի փետրվարի 22-ի որոշման վերաբերյալ, չորեքշաբթի հաղորդում է Trend-ը։
«Մենք ողջունում ենք դատարանի ընդունումը, որ Հայաստանը պարտավոր է զերծ մնալ իրավիճակի սրումից՝ համաձայն դատարանի նախորդ՝ 2021 թվականի դեկտեմբերի 7-ի որոշման», - ասված է հայտարարության մեջ։
Ադրբեջանի ԱԳՆ-ն նշել է, թե «դատարանի որոշումը՝ չվերանայել իր նախկին եզրակացությունը, որ Հայաստանի կողմից հակահետևակային ականների տեղակայումը չի համապատասխանում ժամանակավոր միջոցների կիրառման պահանջներին, ըստ էության բովանդակային որոշում չէ, և Ադրբեջանը կշարունակի ձգտել Հայաստանին պատասխանատվության ենթարկել»։
«Ադրբեջանը կշարունակի պաշտպանել բոլոր մարդկանց իրավունքները՝ համաձայն միջազգային իրավունքի և պատասխանատվության կենթարկի Հայաստանին մարդու իրավունքների շարունակվող լուրջ խախտումների համար»,- ասված է հայտարարության մեջ։
Հիշեցնենք, որ այսօր՝ փետրվարի 22-ին, դատարանը հրապարակել է Հայաստանի ներկայացրած պահանջի վերաբերյալ որոշումը ու փաստել․ «Դեկտեմբերի 12-ից կապը Լաչինի միջանցքով խաթարված է, խոչընդոտվել է Լեռնային Ղարաբաղ սննդամթերքի, դեղորայքի և անհրաժեշտ այլ ապրանքների մատակարարումը ինչն անուղղելի վնաս կարող է պատճառել․ «Դատարանը համարում է, որ ժամանակավոր միջոց կիրառելն անհրաժեշտ է, դատարանն արձանագրում է, որ Ադրբեջանը պարտավոր է ձեռնարկել իրենով պայմանավորված միջոցները Լաչինի միջանցքով մարդկանց ու բեռների անխափան շարժը երկու ուղղությամբ ապահովելու համար»։
Մեկ այլ որոշմամբ էլ Արդարադատության միջազգային դատարանը մերժել է Ադրբեջանի պահանջը Հայաստանի դեմ ժամանակավոր միջոցներ կիրառելու վերաբերյալ։