Լաչինի շուրջ վերջին օրերի զարգացումները ոգևորիչ են. Տոյվո Կլաար. «Ազատություն»

Մենք տեսել ենք որոշակի հուսադրող զարգացումներ վերջին մի քանի օրերին, եւ ես հույս ունեմ, որ մոտ ապագայում հնարավոր կլինի և՛ ապրանքների, և մարդկանց ազատ տեղաշարժը Լաչինի միջանցքով, ինչպես դա եղել է նախկինում։ Այս մասին «Ազատություն» ԵԿ հետ հարցազրույցում ասել է Հարավային Կովկասի հարցերով Եվրամիության հատուկ ներկայացուցիչ Տոյվո Կլաարը:

Մասնավորապես, անդրադառնալով դիտարկմանը, որ փաստացի անգամ Հաագայի դատարանի որոշումը չստիպեց Ադրբեջանին ապաշրջափակել Լաչինի միջանցքը, Կլաարը նշել է. «Դե, վերջին մի քանի օրերին որոշակի հետաքրքիր զարգացումներ եմ տեսնում։ Եվ հիմա ստացվեցին էլեկտրաէներգիայի և գազի վերականգնման մասին հաղորդումները։ Եվ այդ համատեքստում ես լիահույս եմ, որ գուցե ամեն ինչ ճիշտ ուղղությամբ է ընթանում։ Եվրամիությունը հետևողական հանդես է եկել իրավիճակի ապաշրջափակման օգտին: Մենք տարբեր շփումներ ենք ունեցել և՛ կուլիսներում, և՛ հրապարակային։ Եվ ընդհանրապես, մենք հաստատ համոզված ենք, որ կարևորն այն է, որ Ղարաբաղի բնակչությունը, տեղի հայերը կարողանան իրենց ապահով զգալ այն վայրում, որտեղ ապրում են, և դրա համար կարևոր է, որ իրական երկխոսություն մեկնարկի Բաքվի և Ստեփանակերտի միջև։ Եվ դա է առաջ գնալու ճանապարհը՝ մարդկանց ներգրավելու, վստահություն ներշնչելու, որ ապագայի համար ապահով զգան այն վայրում, որտեղ ապրում են»։

Դիտարկմանը, որ Երևանը միջազգային գործընկերներից ակնկալում է ավելի գործուն միջոցներ, ճնշում Բաքվի վրա, արդյո՞ք նա

դիտարկում է պատժամիջոցների հնարավորությունը, Կլաարը փաստացի խուսանավել է՝ ըստ այդմ, հաստատելով, որ Ադրբեջանի նկատմամբ պատժամիջոցների հնարավորություն չի դիտարկվում: Նշված հարցադրմանը պատասխանելով՝ Կլաարն ասել է. «Կրկին, կարծում եմ, որ մենք տեսել ենք որոշակի հուսադրող զարգացումներ վերջին մի քանի օրերին։ Եվ ես հույս ունեմ, որ մոտ ապագայում հնարավոր կլինի և՛ ապրանքների, և մարդկանց ազատ տեղաշարժը Լաչինի միջանցքով, ինչպես դա եղել է նախկինում։ Այդ համատեքստում կրկին ամենակարևորն է, որ բնակչությունը զգա, որ կարող է ապահով ապրել այն վայրերում, որտեղ նրանք ապրել են տասնամյակներ, դարեր շարունակ, և որ ցանկացած այլ խնդիր, նաև օրինական մտահոգություններ, քննարկվեն բանակցային սեղանի շուրջ»:

Նշենք, որ Հաագայի դատարանը փետրվարի 22-ին որոշում էր կայացրել ՝բավարարելով Հայաստանի պահանջները՝ Ադրբեջանի դեմ ժամանակավորապես միջոցներ կիրառելու վերաբերյալ՝ պարտավորեցնելով մինչև Հայաստանն ընդդեմ Ադրբեջանի գործով վերջնական որոշման կայացումը՝ ձեռնարկել բոլոր միջոցները երաշխավորելու Լաչինի միջանցքով քաղաքացիների, տրանսպորտային միջոցների և բեռների՝ երկու ուղղություններով անխափան տեղաշարժը: Դատարանի որոշումից օրեր անց Լաչինի միանցքի ապաշրջափակման հարցում որևէ դրական տեղաշարժ չկա և պարզ չէ, թե կոնկրետ ինչն է հուսադրել արևմուտքին: