ԱՄՆ-ում երկու կանայք 5 օր առանց ուտելիքի անցկացրել են ձյան տակ հայտնված մեքենայում և ողջ մնացել

Կանայք 5 օր անցկացրել են -15℉ ջերմաստիճանի պայմաններում՝ ձյան տակ հայտնված մեքենայում, մինչև որ նրանց փրկել են: Նրանց պատմությամբ կիսվել է New York Post-ը։

Մեն նահանգում ձնաբքի ժամանակ անհետանալուց հինգ օր անց երկու կանայք են հայտնաբերվել։ Նրանք հրաշքով ողջ են մնացել իրենց ամենագնացում՝ առանց սննդի և ջերմության: Հաղորդվում է, որ այդ ժամանակ ջերմաստիճանը իջած է եղել մինչև -15℉, այսինքն՝ մոտ -26℃։

51-ամյա Քիմբերլի Պուշարդիին և 50-ամյա Անժելա Բուսելուն վերջին անգամ տեսել էին չորեքշաբթի՝ փետրվարի 22-ին՝ իրենց Jeep-ը Սփրինգֆիլդում լիցքավորելիս: Հաղորդվում է, որ նրանք մեկ օր առաջ գնացել էին բոուլինգ խաղալու:

Հայտնի է նաև, որ երկու կանայք սահմանափակ մտավոր կարողություններ ունեն։ Նրանք մոլորվել էին, և երբ ընտանիքի անդամներն ու ոստիկանները փորձել էին նրանց հեռակա կարգով ուղղորդել, կանանց հեռախոսներն անջատվել էին: Շուտով նրանց բենզին էլ էր վերջացել։

Փրկարարները ստիպված են եղել օգտագործել ուղղաթիռներ, ինքնաթիռներ և մեքենաներ։ Խուզարկություններ են անցկացվել նաև հարևան Մասաչուսեթսում և Նյու Հեմփշիրում։

Կիրակի օրը՝ փետրվարի 26-ին, նրանց վերջապես հայտնաբերել է անտառապահը: Նա նկատել է ձյունով ծածկված կարմիր մեքենան։

Տղամարդը տեղյակ է եղել խուզարկության մասին և գոռացել է կանանց անունները։ Անտառապահը խոստովանել է, որ չէր պատրաստվում ձնագնացով գնալ այդ արահետով։

«Այսպիսի բաները միշտ պատահական են լինում։ Կարծում եմ, որ հենց այդպես էլ պետք է լիներ»,- ասել է տղամարդը Times Record-ին տված հարցազրույցում։

Կանայք ուտելիք չեն ունեցել, և նրանց մոտ եղել է միայն Mountain Dew-ի կիսադատարկ շիշ, սակայն այն սառել էր։

«Եթե առաջին օրը նրանց բենզինը վերջանար՝ ամեն ինչ կարող էր այլ կերպ ավարտվել», - ասել է նահանգի փրկարար ծառայության ղեկավարը:

Արդյունքում կանայք միայն մեկ օր են անցկացրել ամբողջությամբ առանց ջերմության։ Փրկարարն ասել է, որ տուժածները ողջ չէին մնա, եթե փորձեին օգնության հասնել ոտքով, քանի որ այդ ճանապարհը զգալի հեռավորության վրա է գտնվում հիմնական ճանապարհներից և կանոնավոր երթևեկությունից։ Կանանցից մեկի մոտ ցրտահարություն է ախտորոշվել, սակայն նույն օրը երեկոյան դուրս է գրվել հիվանդանոցից։ Մյուսը միասյն կապտուկներ է ստացել։