Ինքը ճիշտ է, մնացածը՝ սխալ․ մարդիկ հավատում են նրան, ինչին ուզում են հավատալ․ Արթուր Ղազինյան

ԱԺ «Հայաստան» խմբակցության նախկին պատգամավոր Արթուր Ղազինյանը ֆեյսբուքյան էջում գրառում է արել․

«Հայաստանում հնարավոր չէ փոխել մարդու կարծիքն ու համոզմունքը ինչ-որ անձի կամ երևույթի մասին:

Չի աշխատում ոչ մի փաստարկ, ապացույց, կոնկրետ օրինակ, հիմնավորում. մարդն հավատում է նրան, ինչն իրեն հաճելի է և ինչը համապատասխանում է իր համոզմունքներին:

Եթե մարդիկ ցանկանում են հավատալ, որ Արցախը «ծախել էին» դեռ 90-ականների սկզբին ու հետևողականորեն շարունակում էին «ծախել» մինչև 2018 թ․ մայիս, ուրեմն դա է ճիշտը:

Չի ընդունվում որևէ այլ փաստարկ կամ ապացույց, որ դա այդպես չէ, որ Արցախը որևէ մեկը երբեք չի ցանկացել «ծախել»: Իրենք այսպես են ուզում մտածել, այդպես իրենք ճիշտ են, չեն սխալվել, մեղավոր չեն ոչ մի բանի համար:

Կամ եթե մարդիկ ուզում են հավատալ, որ 44-օրյա պատերազմը մենք պատրվել ենք բանակում գործող «5-րդ շարասյան» պատճառով, ապա նրանց ոչ մի դեպքում հակառակը չես համոզի: Չեն լսի, չեն ընդունի, այլապես իրենք սխալ կլինեն ու մեղավոր կլինեն պատմական մասշտաբի ողբերգության ու աղետի համար:

Իսկ նրանք երբեք ու ոչ մի բանում մեղավոր չեն ու չեն կարող լինել:

Մարդիկ հավատում են նրան, ինչին ուզում են հավատալ. հարմար է էդպես, ինքը ճիշտ է, մնացածը՝ սխալ: Ու բացարձակ կարևոր չէ, թե որտեղ է ճշմարտությունը, քանի որ ճշմարտությունը նրանց ուղղակի չի հետաքրքրում . . .»։