Մոնակոյի իշխան Ալբեր II-ը հայտնել է, որ իրեն կառևանգեն իր ծննդյան օրը

Ալբեր II-ը պատրաստվում է իր ծննդյան օրը առևանգվել իր երեխաների՝ 8-ամյա երկվորյակներ Ժակի և Գաբրիելայի կողմից։ Այդ մասին գրում է People-ը։

«Ամեն ինչ շատ համեստ է լինելու։ Երեքշաբթի մենք կունենանք փոքրիկ ընտանեկան ընթրիք։ Դրանից հետո, երբ երեխաները վերադառնան դպրոցից, ինձ կառեւանգեն։ Իսկապես։ Ինձ ասացին, որ պատրաստ լինեմ առևանգմանը 17:30-ին»,- հարցազրույցում պատմել է Մոնակոյի իշխանը:

Ալբեր II-ը պարզաբանել է, որ իրականում ինքը չպետք է իմանար երեխաների ծրագրերի մասին։ 

Անդրադառնալով իր տարիքին՝ Մոնակոյի իշխանն ասել է, որ իր ընկերներն արդեն թոշակի են անցնում 65 տարեկանում, սակայն ինքը չի կարող դա անել։

«Վաթսունհինգը, ենթադրում եմ, որոշակի հնչեղություն ունի, բայց ինձ համար դա հերթական ծննդյան օրն է: Դա նշաձող չէ: Ես արդեն ասել եմ, որ 60-ը նոր 40-ն է։ Եվ այսպես շարունակ։ 65-ը նոր 45-ն է»,- կիսվել է Ալբեր II-ը: