Աստղային ոճաբան Լո Ռոուչը թոշակի է անցել 44 տարեկանում

Ոճաբան Լո Ռոուչը, ով անցյալ տարի Ամերիկայի նորաձևության դիզայներների խորհրդի կողմից ճանաչվել է «2022 թվականի տարվա ոճաբան», հայտարարել է իր թոշակի անցնելու մասին։ Համապատասխան գրառումը նա հրապարակել է իր միկրոբլոգում։

«Իմ բաժակը դատարկվել է... Շնորհակալ եմ բոլորին, ովքեր այս տարիների ընթացքում աջակցել են ինձ կարիերայիս ճանապարհին: Բոլոր այն մարդկանց, ովքեր ինձ վստահել են իրենց կերպարները, ես անչափ շնորհակալ եմ ձեզ: Եթե ​​այս գործը միայն հագուստով լիներ, ես ամբողջ կյանքում այս գործով կզբաղվեի, բայց ցավոք դա այդպես չէ։ Քաղաքականությունը, սուտն ու կեղծ օրակարգը վերջապես ինձ հասան։ Դու հաղթեցիր... ես դուրս եմ գալիս»,- գրել է 44-ամյա ոճաբանը Instagram-ում։

Ծնունդով Չիկագոյից Լո Ռոուչն ավարտել է Չիկագոյի պետական ​​համալսարանը, որտեղ սովորել է հոգեբանություն և սկսել իր կարիերան նորաձևության ոլորտում՝ բացելով օգտագործված հագուստի խանութ՝ Deliciously Vintage-ը: Ոճաբանին համբավ բերեցին 2009 թվականին Քանյե Ուեսթի հայտնվելն իր խանութում և պապարացիների՝ այս այցի ընթացքում արված լուսանկարները։

Լո Ռոուչի առաջին հայտնի հաճախորդը Զենդայան էր, և նա իր իսկական համբավը ձեռք բերեց Սելին Դիոնի հետ աշխատելուց հետո: Նա նաև աշխատել է Արիանա Գրանդեի, Թոմ Հոլանդի, Քերի Վաշինգտոնի հետ։

2016 թվականին Լո Ռոուչը դարձավ America's Next Top Model-ի դատավորներից մեկը։ 2021 թվականին նա ոճավորել է տասը աստղերի տեսքը Met Gala կոստյումների ինստիտուտի պարահանդեսին։