ՀՀ դեսպանը կանչվել է ՌԴ ԱԳՆ․ նրան բողոքի նոտա է հղվել

Ռուսաստանում Հայաստանի Հանրապետության դեսպան Վաղարշակ Հարությունյանը կանչվել է ՌԴ ԱԳՆ։ Ըստ Ռուսաստանի արտաքին գերատեսչության հայտարարության՝ Մոսկվան իր կոշտ դիրքորոշումն ու բողոքի նոտան է հայտնել Երևանին։

Նշվում է, որ Հայաստանի ղեկավարությունը վերջին օրերին ձեռնարկել է մի շարք ոչ բարեկամական քայլեր, այդ թվում.

• ՄՔԴ-ի Հռոմի ստատուտի վավերացման գործընթացի մեկնարկը,
• Վարչապետի տիկնոջ՝ Ա. Վ. Հակոբյանի այցը Կիև և նացիստական ​​ռեժիմին մարդասիրական օգնություն փոխանցումը,
• ԱՄՆ-ի մասնակցությամբ հայկական տարածքում զորավարժությունների անցկացումը։

«Այս առնչությամբ Մոսկվայում Հայաստանի դեսպան Վ. Վ․ Հարությունյանը կանչվել է ՌԴ ԱԳՆ, ում նկատմամբ կոշտ հայտարարություն է արվել։

Բացի այդ, ուղարկվել է բողոքի նոտա, որում նշվում է սեպտեմբերի 6-ին ՀՀ ԱԺ նախագահ Ա. Ռ. Սիմոնյանի վիրավորական հայտարարությունների անընդունելիության մասին՝ ուղղված Ռուսաստանի արտաքին գործերի նախարարության պաշտոնական ներկայացուցիչ, տեղեկատվության և մամուլի դեպարտամենտի տնօրեն Մ. Վ. Զախարովային և ընդհանուր առմամբ ՌԴ ԱԳՆ-ին։

Առանձին մտահոգություններ են հնչել սեպտեմբերի 7-ին Հայաստանում բլոգեր Մ. Բադալյանի և Sputnik Արմենիայի սյունակագիր Ա.Գևորգյանի ձերբակալության վերաբերյալ։

Միևնույն ժամանակ, Մոսկվան համոզված է, որ Ռուսաստանը և Հայաստանը մնում են դաշնակիցներ, և գործընկերային հարաբերությունների զարգացման և ամրապնդման վերաբերյալ բոլոր պայմանավորվածությունները լիովին կիրականացվեն՝ ի շահ մեր երկու երկրների ժողովուրդների։ Ի թիվս այլ հարցերի, դա վերաբերում է նաև ՀԱՊԿ զորավարժությունների կազմակերպմանը և հետագայում կազմակերպության դիտորդական առաքելություն ուղարկելուն՝ Հայաստանի և Ադրբեջանի միջև կարգավորմանը նպաստելու համար»,– ասված է հաղորդագրությունում։

Գերատեսչությունը նշել է, որ ռուսական կողմը կշարունակի այդ նպատակով գործադրել բոլոր անհրաժեշտ ջանքերը։