Մարոկկոյում 6,9 մագնիտուդ ուժգնությամբ երկրաշարժ է գրանցվել. 632 մարդ է զոհվել

Մարոկկոյում տեղի ունեցած երկրաշարժի հետևանքով` զոհվել է առնվազն 632 մարդ, ևս 329-ը տեղափոխվել է հիվանդանոց: Այս մասին հայտնում է Al Arabiya-ն։

Սեպտեմբերի 9-ի գիշերը տեղի է ունեցել 6,8 մագնիտուդ ուժգնությամբ երկրաշարժ, որը տեւել է մի քանի վայրկյան։ Եվս 19 րոպե անց 4,9 մագնիտուդով հետցնցում է տեղի ունեցել։

Երկրաշարժի էպիկենտրոնը գտնվել է Ալ-Հաուզ նահանգի Իգիլ քաղաքի մոտ՝ Մարաքեշից մոտ 70 կմ հարավ։ ԱՄՆ Երկրաբանական ծառայության տվյալներով՝ օջախը գտնվել է 18 կմ խորության վրա, Մարոկկոյի սեյսմիկ գործակալության տվյալներով՝ 11 կմ խորության վրա։ Նման մակերեսային երկրաշարժերը սովորաբար ավելի ավերիչ են, նշում է AP-ն։

Երկրաշարժը մասամբ ավերել է Մարաքեշի հին հատվածը, որը ՅՈՒՆԵՍԿՕ-ի համաշխարհային ժառանգության օբյեկտ է: Վնասվել է նաև քաղաքի ամենամեծ մզկիթը՝ Քութուբիան, որը կառուցվել է 12-րդ դարում։ Նրա եզակի 69 մետրանոց մինարեթը կոչվում է «Մարաքեշի տանիք»։ Ավերածությունների մասշտաբները ճշտվում են։

Ռիֆ լեռների հյուսիսում գտնվող Ալ Հոսեյմայի մոտ 2004 թվականին տեղի ունեցած երկրաշարժից հետո, որն ավելի քան 600 մարդու կյանք խլեց, այս երկրաշարժն ամենամահաբերն էր Մարոկկոյում, նշում է Reuters-ը:

Ցնցումները զգացվել են նաև թագավորության սահմաններից դուրս՝ հարևան Ալժիրում և Պորտուգալիայում։