Վլադիմիր Պուտին. «Ընտրությունների արդյունքները չեղյալ հայտարարելը բացառված է»

Ռուսաստանի վարչապետ Վլադիմիր Պուտինը բացառել է դեկտեմբերի 4–ին անցկացված պետդումայի ընտրությունների արդյունքները չեղյալ հայտարարելու հնարավորությունը, որի համար արդեն երեք շաբաթից ավելի է պայքարում են ընդդիմության ներկայացուցիչները։  

Ըստ Պուտինի՝ Պետական Դուման արդեն սկսել է իր աշխատանքները և ընտրությունների արդյունքները վերանայելն անիմաստ է։

«Պետդումայի ընտրություններն ավարտվել են։ Խորհրդարանական բոլոր խմբակցությունները սկսել են իրենց աշխատանքը, արդեն ընտրվել է խորհրդարանի նախագահը։ Կարծում եմ, որ Պետդուման իր գործառույթներն իրականացնում է։ Եվ խոսել ընտրությունների արդյունքների փոփոխության մասին` անհնարին բան է», - Պուտինը ասել է «Ազգային ժողովրդական ճակատ»–ի դաշնային համակարգող խորհրդի անդամների հետ հանդիպման ժամանակ։

Նրանք, ովքեր համաձայն չեն այդ արդյունքների հետ, Պուտինն առաջարկել է դիմել դատարան։

«Եթե կա որեւէ խախտում, ապա դատարանը պետք է քննարկի եւ օբյեկտիվ որոշում կայացնի այդ հարցերի շուրջ», - ասել է Պուտինը։

Պուտինը խոստացել է, որ առաջիկա նախագահական ընտրությունները կլինեն «բացարձակ թափանցիկ»։