ՈւՂԻՂ. Փաշինյանը ԱԺ-ում է. պետբյուջեի քննարկումները շարունակվում են

Ազգային ժողովում շարունակվում է դեկտեմբերի 5-ին մեկնարկած հերթական նիստի աշխատանքները։ 

Խորհրդարանը կշարունակի քննարկել Մրցակցության պաշտպանության հանձնաժողովի մեկ անդամի և Կոռուպցիայի կանխարգելման հանձնաժողովի երկու անդամի ընտրության հարցը, կհրապարակվեն Հաշվեքննիչ պալատի մեկ անդամի, Հեռուստատեսության և ռադիոյի հանձնաժողովի երկու անդամի, ինչպես նաև Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորի թափուր տեղի համար առաջադրված թեկնածուի ընտրության արդյունքները։

Նիստի ընթացքում ԱԺ-ն կքննարկի «Հայաստանի Հանրապետության 2024 թվականի պետական բյուջեի մասին» օրենքի նախագիծը, որի վերաբերյալ հիմնական զեկույցով հանդես կգա Ֆինանսների նախարար Վահե Հովհաննիսյանը։

Պատգամավորների քննարկմանը կներկայացվի նաև «Սնանկության մասին» օրենքում փոփոխություններ եւ լրացումներ կատարելու մասին, «Հայաստանի Հանրապետության քաղաքացիության մասին» օրենքում լրացումներ եւ փոփոխություն կատարելու մասին, «Դիվանագիտական ծառայության մասին» օրենքում փոփոխություններ եւ լրացումներ կատարելու մասին, «Ազգային անվտանգության մարմիններում ծառայության մասին» օրենքում փոփոխություններ եւ լրացումներ կատարելու մասին եւ «Հանրային ծառայության մասին» Հայաստանի Հանրապետության օրենքում լրացումներ կատարելու մասին նախագծերը։

Ժամը 16:30-ին ԱԺ-ում կկայանա կառավարության անդամերի հետ հարցուպատասխանը: