Սպանության գործով ձերբակալվել է «Слово пацана» սերիալի դերասանը (լուսանկարներ)

Մոսկվայի Զամոսկվորեցկի շրջանային դատարանը 2011 թվականին կատարված սպանության մեղադրանքով երկու ամսով կալանավորել է դերասան Սերգեյ Բազանովին, ով էպիզոդիկ դեր է կատարել Ժորա Կրիժովնիկովի «Слово пацана» սերիալում։ Այս մասին հաղորդվում է ընդհանուր իրավասության դատարանների Telegram-ի պաշտոնական ալիքում։

Մոսկվայի քաղաքային լրատվական գործակալության աղբյուրի փոխանցմամբ՝ Բազանովը գործարար Ալեքսանդր Ձաբիևի սպանության գործով մեղադրյալներից մեկն է։ 12 տարի առաջ չորս անհայտ տղամարդ հարձակվել են գործարարի վրա և փորձել խլել նրա 900 հազար դոլարով պայուսակը։ Ձաբիևը դիմադրել է, սակայն հարձակվողները ատրճանակով վիրավորել են նրան, հափշտակել գումարը և դիմել փախուստի։ Տուժածը հոսպիտալացվել է, իսկ ավելի ուշ՝ մահացել։

Դերասանը մեղադրվում է Ռուսաստանի Դաշնության Քրեական օրենսգրքի 105-րդ հոդվածով (սպանություն, որը կատարվել է խմբավորման կազմում շահադիտական ​​դրդապատճառներով՝ կողոպուտի նպատակով):

Այս հոդվածով առավելագույն ժամկետը ցմահ ազատազրկումն է: