9 նոտար, 4 հարկադիր կատարող, 12 ՔԿՀ ծառայող և 3 պետ, 2 պրոբացիայի ծառայող ենթարկվել են պատասխանատվության

Արդարադատության նախարարության վերահսկողական վարչության աշխատանքային խումբը՝ վարչության պետի տեղակալ Արտաշես Սուչյանի գլխավորությամբ, հավաքագրելով քաղաքացիների բողոքները, ինչպես նաև վեր հանելով այլ թերացումները, հետևողականորեն շարունակում է կարգապահական վարույթների շրջանակում նախատեսված միջոցներով պայքարել նախարարության ստորաբաժանումներում հայտնաբերվող անբարեխիղճ ծառայողների և արատավոր երևույթների դեմ:

Այսպիսով` 9 նոտարների նկատմամբ հարուցված կարգապահական վարույթների արդյունքում կիրառվել են կարգապահական պատասխանատվության միջոցներ՝ 1 «նկատողություն», 2 «խիստ նկատողություն», 3 «գործունեության կասեցում»։ Երեք նոտարների նկատմամբ հարուցված կարգապահական վարույթներ կարճվել են՝ խախտման նվազ կարևոր լինելու հիմքով:

Երեք կարգապահական վարույթ է իրականացվել սնանկության գործերով կառավարիչների նկատմամբ, որոնց արդյունքում մեկ սնանկության գործով կառավարչի գործունեություն կասեցվել է, իսկ երկուսինը՝ դադարեցվել:
Եվս 1 սնանկության գործով կառավարչի լիազորություններ դադարեցվել են քաղաքացու դիմումի ուսումնասիրության արդյունքում։

Քրեակատարողական և պրոբացիայի ոլորտում վերահսկողական վարչությունն իրականացրել է թվով 3 ծրագրային ուսումնասիրություն, որոնցից մեկի արդյունքներով համապատասխան քրեակատարողական հիմնարկի 12 քրեակատարողական և 1 քաղաքացիական ծառայողներ ենթարկվել են տարբեր տեսակի կարգապահական տույժերի, երկրորդով՝ կազմվել է տեղեկանք և Արդարադատության նախարարի կողմից համապատասխան գրություն է ուղարկվել ՀՀ գլխավոր դատախազություն, իսկ երրորդով կազմվել է համապատասխան տեղեկանք:

Իրականացվել է թվով 10 ծառայողական քննություն, որոնց արդյունքում թվով 3 քրեակատարողական հիմնարկի պետեր և թվով 2 պրոբացիայի ծառայողներ ենթարկվել են տարբեր տեսակի կարգապահական տույժերի։

Իրավաբանական անձանց պետական ռեգիստրի գործակալության գործունեության վերաբերյալ հարուցվել են թվով 7 վարչական վարույթներ, արդյունքում 1 բողոք բավարարվել է մասնակի, 2 բողոքների հիման վրա հարուցված վարչական վարույթները կարճվել են, 4 բողոքներ մերժվել են: Իրականացվել են թվով 4 ծառայողական քննություններ, որոնց արդյունքներով՝ 2 դեպքում կիրառվել է կարգապահական տույժ՝ 1 «նկատողություն», 1 «նախազգուշացում», ծառայողական քննություններից մեկը կասեցվել է՝ նյութերն ուղարկվել են ՀՀ հակակոռուպցիոն կոմիտե, մեկը դադարեցվել է, ծառայողական քննության մասնակիցներից մեկի զբաղեցրած պաշտոնից ազատվելու հիմքով:

Հարկադիր կատարումն ապահովող ծառայությունում իրականացված ծրագրային ուսումնասիրությունների արդյունքներով 4 հարկադիր կատարողի նկատմամբ կիրառվել է կարգապահական տույժ՝ 1 «նախազգուշացում», 1 «նկատողություն», «2 խիստ նկատողություն»:

Հինգ դիմում-բողոքի ուսումնասիրության արդյունքում տրված ցուցումների հիման վրա գլխավոր հարկադիր կատարողի համապատասխան հրամաններով նշանակվել են ծառայողական քննություններ: Արդյունքում 6 հարկադիր կատարողի նկատմամբ կիրառվել է «Նկատողություն» տեսակի կարգապահական տույժ: