Առաջին անգամ Tesla էլեկտրոպիկապի մասնակցությամբ վթար է տեղի ունեցել

ԱՄՆ-ում առաջին անգամ վթար է գրանցվել գործարար Իլոն Մասկի Tesla Cybertruck էլեկտրական ամենագնացի մասնակցությամբ։ Միջադեպը տեղի է ունեցել Կալիֆորնիայի Պալո Ալտո քաղաքի ճանապարհներից մեկում, հայտնում է The Verge-ը՝ վկայակոչելով ոստիկանության տվյալները։

Վթարի վայրից լուսանկարները հրապարակվել են Reddit ֆորումում։ Ոստիկանության աշխատակիցներն ավելի ուշ լրագրողներին հաստատել են, որ SR-35 մայրուղու վրա բախվել են Tesla Cybertruck-ը և 2009 թվականի Toyota Corolla մարդատար ավտոմեքենան, որի ղեկին եղել է 17-ամյա դեռահաս։

Ըստ նախնական տեղեկությունների՝ Toyota-ի վարորդը կորցրել է կառավարումը, ինչի հետևանքով նրա մեքենան նախ դուրս է եկել ճանապարհի երթևեկելի հատվածից և բախվել հողաթմբին, այնուհետև վերադարձել ճանապարհի երթևեկելի հատված և բախվել Cybertruck-ին։

Վթարի պահին ամենագնացում երեք մարդ է եղել։ Վթարի հետևանքով Tesla-ի վարորդը ստացել է թեթև վնասվածքներ և հրաժարվել բուժօգնությունից։ Այլ տուժածներ չեն եղել։