Գորիսում արցախցի երկու ընտանիքներ նոր բնակարան են ստացել

Գորիս համայնքում հաստատված արցախցի երկու ընտանիքներ նոր բնակարան ստացան։ Նորակառույց բնակարանների բանալիներն արցախցի մեր հայրենակիցներին հանձնել է համայնքի ղեկավար Առուշ Առուշանյանը։ 

Դաժան փորձությունների միջով անցած արցախցի ընտանիքներից երկուսի՝ սեփական տանիք ունենալու ցանկությունն իրականացել է:

«Ընդամենը 15 օրից ևս մեկ բնակարանաշինության խոշոր ծրագիր է մեկնարկելու, այս անգամ 19 ընտանիքի համար: Հաջորդ տարի Գորիս համայնքում պլանավորում ենք ընդհանուր 100 ընտանիքի համար նոր բնակարաններ կառուցել, որոնք հավասարապես կհանձնվեն Արցախից բռնի տեղահանված ընտանիքներին և անտուն գորիսեցիներին»,- նշել է Առուշ Առուշանյանը։

Բնակարաններն ամբողջովին կահավորված են անհրաժեշտ իրերով, կենցաղային տեխնիկայով: Ընտանիքներից մեկն ունի 5 անչափահաս երեխա, մյուսը` բաղկացած է 4 հոգուց:

Նշենք, որ Առուշ Առուշանյանի նախաձեռնությամբ և ամերիկահայ բարերարների աջակցությամբ` երկու ամիս առաջ Գորիսում մեկնարկել էին բնակարանների վերակառուցման աշխատանքները։ Ամերիկահայ Գարեն Բաբախանն ու Զարեհ Թումանյանն իրենց ավագ ընկերների հետ գումար էին հավաքել և որոշել օժանդակել արցախահայերին:

Գարեն ու Զարեհը այցելել են Գորիս, անձամբ են գնել անհրաժեշտ շինանյութը և մասնակցել բնակարանների կառուցապատման աշխատանքներին: Նախաձեռնությանը օժանդակել է «Վիննեթ Գորիս» զարգացման հիմնադրամը: Բնակարանների վերակառուցման աշխատանքներն ամբողջովին իրականացրել է համայնքապետարանի ենթակայությամբ գործող Գորիս բարեկարգում ՀՈԱԿ-ը:
Ներկերի տրամադրման հարցում օժանդակել է  Հայաս Ֆինլանդիա ընկերության հիմնադիր Աբգար Մարգարյանը: Բնակարանների կահավորման աշխատանքներն իրականացվել են բարերարներ Ռուբեն Հարությունյանի, Սերգեյ Սարկիսովի և Արման Ղուկասյանի աջակցությամբ:

Բնակարանամուտի արարողությանը մասնակցել են բազմաթիվ գորիսեցիներ՝ շնորհավորել տեղահանված արցախցիներին բնակարանամուտի առիթով, կիսել նրանց ուրախությունը: