Մուտք ենք գործում 2024 թվական՝ Աբովյան համայնքը զարգացնելու, բարեկարգելու նոր ծրագրերով. Էդուարդ Բաբայան

Աբովյան համայնքի ղեկավար Էդուարդ Բաբայանի շնորհավորական ուղերձը.

«Աբովյան համայնքի հարգելի՛ բնակիչներ.​ ​ ​ ​ ​
Ավարտին է մոտենում 2023 թվականը, որը մեր համայնքում հատկանշվեց մաշտաբային և կարևոր մի շարք աշխատանքների իրականացմամբ: Համայնքապետարանի նախաձեռնությամբ, ինչպես նաև բնակիչ-համայնք, համայնք-պետություն արդյունավետ համագործակցություններով անցնող տարում կյանքի կոչեցինք կառուցապատման և բարեկարգման բազում ծրագրեր: Աշխատանքային ակտիվությանն ու առաջընթացին զուգահեռ՝ մենք միասնաբար հաղթահարեցինք մեր առջև ծառացած մի շարք մարտահրավերներ: Կարևոր եմ համարում արձանագրել, որ Արցախի բռնի հայաթափումը ծանր ու ցավալի իրադարձություն էր յուրաքանչյուրիս համար, սակայն մենք, չընկրկելով դժվարությունների առջև, համախմբված​ կազմակերպեցինք բռնի տեղահանված մեր հայրենակիցների հաշվառման, կարիքների գնահատման և աջակցությունների տրամադրման ծավալուն աշխատանքները: ​ ​ ​
Հակառակ ստեղծված դժվարին իրավիճակին՝ ուզում եմ տարեմուտին ընդառաջ մեր բոլոր հայրնեակիցները զինվեն լավատեսությամբ, նոր ուղիներ հարթելու պատրաստակամությամբ և պայքարելու, առաջ շարժվելու հաստատակամությամբ:​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​
Ամանորյա և Սուրբ Ծննդյան տոների կապակցությամբ առաջին հերթին ջերմորեն շնորհավորում եմ առաջնագծում մեր հայրենիքի սահմաններն անառիկ պահող զինծառայողներին, մաղթում եմ խաղաղություն, քաջառողջություն, զգոն և անվտանգ ծառայություն:​ ​ ​ ​ ​ ​ ​ ​ ​ ​ ​ ​
Սիրելի՛ հայրենակիցներ, Աբովյան համայնքի հարգելի՛ բնակիչներ.
Մենք մուտք ենք գործում 2024 թվական՝ Աբովյան համայնքը զարգացնելու, բարեկարգելու նոր ծրագրերով, ձեզ հետ միասին էլ ավելին անելու պատրաստակամությամբ ու դրական միտումներով:​ ​ ​ ​ ​ ​ ​ ​ ​ ​
Ամենաջերմ և ընտանեկան տոների կապակցությամբ շնորհավորում եմ բոլորիդ, թող որ գալիք տարում խաղաղություն և առաջընթաց հաստատվեն մեր հայրենիքում, ​ առողջություն, երջանկություն և ներդաշնակություն տիրեն ձեր ընտանիքներում և իրականանան տարեմուտին մտապահված նվիրական երազանքները:​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​ ​
Շնորհավոր Ամանոր և Սուրբ Ծնունդ»: